దర్గా అంతర్భాగంలోకి స్త్రీల ప్రవేశానికి హజీ అలీ ట్రస్ట్ ఓకే!

ముంబైలోని హజీ అలీ దర్గాలోని పవిత్ర స్థలమైన అంతర్భాగంలోకి మహిళలకు ప్రవేశం కల్పించేందుకు సిద్ధంగా ఉన్నామని దర్గా ట్రస్ట్ సోమవారం సుప్రీం కోర్టుకు తెలిపింది. పురుషులతో సమానంగా మహిళలకు ప్రవేశం కల్పించాలని బాంబే హైకోర్టు వెలువరించిన తీర్పును వ్యతిరేకిస్తూ ట్రస్ట్ దాఖలు చేసిన పిటీషన్ వెనక్కి తీసుకోవాలని సుప్రీం బెంచ్ సూచించింది. ట్రస్ట్ తరఫున వాదనలు వినిపిస్తున్న సీనియర్ న్యాయవాది మాట్లాడుతూ.. దర్గా అంతర్భాగంలోకి మహిళలను పంపడం కోసం సుప్రీంకు అదనపు అఫిడవిట్ సమర్పించామని తెలిపారు. మహిళలకు, పురుషులకు వేర్వేరుగా ప్రవేశం కల్పించాల్సిన అవసరం ఏంటని కూడా సుప్రీం ప్రశ్నించింది. దీనికి ట్రస్ట్ బదులిస్తూ.. గతంలోనూ ఇలాగే చేశామని వివరించింది. స్త్రీ, పురుషులకు సమాన ప్రవేశాన్ని మాత్రమే మేం కోరుకుంటున్నామని బెంచ్ స్పష్టం చేసింది.

వాస్తవానికి గతంలో ఈ దర్గా లోపలి భాగంలో ప్రవేశించే మహిళలపై ఎలాంటి నిషేధం ఉండేదికాదు. కానీ ఇస్లాం మ‌తాచారాల ప్ర‌కారం ముస్లిం సాధువు స‌మాధి స‌మీపానికి రాకూడ‌ద‌నే కార‌ణంతో మ‌ర్చి 2011 నుంచి ద‌ర్గా లోప‌లి భాగంలోకి మ‌హిళ‌ల ప్ర‌వేశాన్ని నిషేధించారు. అయితే ఈ విషయమై భారతీయ ముస్లిం మహిళా ఆందోళన్ సభ్యులు బాంబే హైకోర్టును ఆశ్రయించగా.. మహిళలకు ప్రవేశం కల్పించాలని ఆదేశిస్తూ బాంబే హైకోర్టు తీర్పునిచ్చింది. హజీ అలీ దర్గా అంతర్భాగంలోకి మహిళలను అనుమతించకపోవడం రాజ్యాంగం ప్రసాదించిన ప్రాథమిక హక్కులకు భంగం కలిగించడమేనని, ఆర్టికల్స్‌ 14, 15, 21కి వ్యతిరేకమని ఆ సందర్భంగా బాంబే హైకోర్టు వ్యాఖ్యానించింది. బాంబే హైకోర్టు తీర్పును సవాల్ చేస్తూ దర్గా ట్రస్ట్ సుప్రీం కోర్టును ఆశ్రయించింది.