బహిరంగ ప్రదేశాల్లో నమాజ్ చేస్తే సహించం.. హరియాణా సీఎం కీలక వ్యాఖ్యలు

బహిరంగ ప్రదేశాల్లో ముస్లింల నమాజ్ చేస్తే కఠిన చర్యలు తీసుకుంటామని హరియాణా ముఖ్యమంత్రి మనోహర్ లాల్ ఖట్టర్ హెచ్చరించారు. ‘గురుగావ్‌లో బహిరంగ ప్రదేశాల్లో నమాజ్ చేస్తే సహించేది లేదు’ అని ఖట్టర్ స్పష్టంచేశారు. ప్రార్థనలు చేసుకునే హక్కు అందరికి ఉంటుంది. .కానీ ఇతరులకు ఇబ్బంది కలిగించేలా ఉండకూడదని.. ట్రాఫిక్‌ను అడ్డుకునేలా ప్రార్థనలు ఉండకూడదని ఆయన సూచించారు. నిర్ధేశించిన ప్రదేశాల్లో మాత్రమే ముస్లింలు ప్రార్థనలు చేసుకోవాలని హరియాణా సీఎం పేర్కొన్నారు.

గురుగావ్‌లోని నిర్దేశించిన ప్రదేశాలల్లో నమాజ్‌కు అనుమతిస్తూ 2018లో హిందువులతో జరిగిన ఘర్షణల తర్వాత కుదిరిన ఒప్పందాన్ని హరియాణా ప్రభుత్వం ఉపసంహరించుకుంది. ప్రార్థనల విషయంలో హిందూ, ముస్లిం వర్గాల మధ్య వివాదం చెలరేగుతుండటంతో సీఎం ఖట్టర్ ఈ నిర్ణయం తీసుకున్నారు. అయితే, గురుగావ్ అధికార యంత్రాంగం అన్ని పక్షాలతో మళ్లీ చర్చలు జరుపుతోందని, ఎవరి హక్కులకు భంగం కలగకుండా సామరస్యపూర్వకమైన పరిష్కారాన్ని రూపొందిస్తామని ముఖ్యమంత్రి హామీ ఇచ్చారు.

అప్పటి వరకూ బహిరంగ ప్రదేశాల్లో ఎవరూ నమాజ్ చేయవద్దని, ఇల్లు, మసీదులోనే చేసుకోవాలని సీఎం సూచించారు. ఈ అంశంపై ముఖ్యమంత్రి మీడియాతో మాట్లాడుతూ.. ‘‘నేను పోలీసులతో మాట్లాడాను.. ఈ సమస్యను త్వరగా పరిష్కరించాలి. ప్రార్ధనా స్థలాల్లో ఎవరైనా ప్రార్థనలు చేయడం వల్ల మాకు ఇబ్బందులు లేవు. ఆ స్థలాలు దీని కోసం నిర్మించబడ్డాయి.. అయితే ఇవి బహిరంగంగా చేయకూడదు.. బహిరంగంగా నమాజ్ చేసే ఆచారాన్ని మేం సహించం’ అని ఖట్టర్ ఉద్ఘాటించారు.

ఆక్రమణకు గురైన వక్ఫ్‌కు చెందిన స్థలాలు, భవనాలను తిరిగి స్వాధీనం చేసుకుని వారికి అందజేసే మార్గాలను అధికారులు రూపొందిస్తున్నారని అన్నారు. ప్రభుత్వ ఆధీనంలోని స్థలంలో బహిరంగ నమాజ్ చేయడంపై హిందూ సంఘాల నుంచి అభ్యంతరం వ్యక్తమవుతోంది. ఇది నిరసనలకు దారితీయడంతో గత నెలలో ప్రార్థనా స్థలంలో ఆవు పేడతో శుద్ధి చేసే వరకూ వెళ్లారు. కొన్నిసార్లు శాంతియుతంగా ముస్లింలు ప్రార్థనలు చేస్తుండగా ‘జై శ్రీరామ్’ అని నినాదాలు చేశారు.