ఇక ఆఫీసుల్లోనే మద్యం తాగొచ్చు.. కార్పోరేట్ ఉద్యోగులకు సర్కార్ గుడ్‌న్యూస్!

Haryna Liquor Policy: ఉదయాన్నే లేవడం, ఆఫీసుకు వెళ్లడం, గంటల తరబడి కంప్యూటర్ల ముందు కూర్చోవడం. కార్పొరేట్ ప్రపంచంలో ఇప్పుడు ఇదే తంతు నడుస్తోంది. మధ్య మధ్యలో టీ, కాఫీ, ఫ్రూట్ జ్యూస్‌లు తాగుతూ కుర్చీల్లో నుంచి లేవకుండా కూర్చునే వారికి హర్యానా సర్కార్ తీపి కబురు అందించింది. ఇక ఆఫీసుల్లోనే మద్యం సేవించేందుకు గ్రీన్ సిగ్నల్ ఇచ్చింది. ఈ మేరకు 2023 - 2024 మద్యం పాలసీలో మార్పులు తీసుకువచ్చింది. ఈ నిర్ణయానికి మే 9న హర్యానా మంత్రివర్గం ఆమోద ముద్ర వేసింది.

వీటికి మాత్రమే అనుమతి
ప్రభుత్వం అనుమతి ఇచ్చింది కదా అని ఎంత పడితే అంత తాగడానికి వీల్లేదు. తక్కువ ఆల్కహాల్ ఉండే మద్యాన్ని మాత్రమే తాగాలని షరతు విధించింది. ఆల్కహాల్ తక్కువగా ఉండే బీర్లు, వైన్లు, మరికొన్ని పానీయాలను పెద్ద పెద్ద కార్పొరేట్ ఆఫీసుల్లోకి అనుమతి ఇస్తూ నిర్ణయం తీసుకుంది. తోటి ఉద్యోగులతో కలిసి మద్యం సేవించవచ్చని చెప్పింది. 5 వేల మందికిపైగా ఉద్యోగులు ఉండి... లక్ష చదరపు అడుగుల విస్తీర్ణం ఉన్న ఆఫీసులకు మాత్రమే.. ఇది వర్తిస్తుందని తెలిపింది.

లైసెన్స్ ఫీజు
జూన్‌ 12 నుంచి ఈ నిబంధన అమల్లోకి వస్తుందని హర్యానా సర్కార్ తెలిపింది. ఈ అనుమతి కోసం కార్పొరేట్‌ సంస్థలకు ఎల్-10 ఎఫ్ (L-10F) అనే ప్రత్యేక లైసెన్స్‌ను జారీ చేయనుంది. ఈ లైసెన్స్‌ పొందాలంటే కార్పొరేట్ సంస్థలు ఏడాదికి రూ. 10 లక్షలు చెల్లించాలని పాలసీలో పేర్కొంది. దీనితోపాటు మరో రూ. 3 లక్షలు సెక్యూరిటీ మొత్తంగా చెల్లించాలని తెలిపింది. కలెక్టర్‌, ఎక్సైజ్‌, ఐటీ కమిషనర్ల అనుమతితో లైసెన్స్‌ మంజూరు చేస్తారని చెప్పింది.Read More Latest National News And Telugu News