ఆరోగ్య సూచి: నేపాల్, బంగ్లా కంటే వెనుకబడ్డ భారత్!!

ప్రపంచ ఆరోగ్య సంస్థ విడుదల చేసిన ఆరోగ్య సూచిలో భారత్ 154 వ స్థానంలో నిలిచింది. గ్లోబల్ బర్డెన్ డిసీజ్ పేరుతో ప్రపంచ ఆరోగ్య సంస్థ విడుదల చేసిన ఈ నివేదికలోని 195 దేశాల కంటే భారత్ చాలా వెనుకబడి ఉంది. అంతే కాదు పక్కనే ఉన్న అతి చిన్న దేశాలు నేపాల్, భూటన్, బంగ్లాదేశ్ కంటే వెనుకబడి ఉండటం గమనార్హం. 1900 నుంచి 2015 మధ్య కాలంలో ఆరోగ్య స్థాయిలను అంచనావేసి, ఆయ దేశాలను సాధించిన లక్ష్యాల మదింపు చేసి, విశ్లేషించి ఈ నివేదికను రూపొందించారు.

బిల్ అండ్ మిలిండా గేట్స్ ఫౌండేషన్ విడుదల చేసిన వివరాల ప్రకారం ఆరోగ్య సూచిలో భారత్ గత 25 ఏళ్ల మధ్య కాలంలో 14.1 పాయింట్లు సాధించింది. 1990లో 30.7 పాయింట్లతో ఉన్న భారత్ 2015 నాటికి 44.8 పాయింట్లకు చేరుకుంది. అయితే ఇది క్షయ, డయాబెటిస్, గుండె, మూత్ర పిండాల వ్యాధుల్లో ఆశించనంత స్థాయిలో లేదని తెలిపింది. పొరుగు దేశాలైన చైనా 74 పాయింట్లు, శ్రీలంక 72.8 పాయింట్లు, నేపాల్ 50.8 పాయింట్లు, భూటన్ 52.7 పాయింట్లు, బంగ్లాదేశ్ 51.7 పాయింట్లతో మన కంటే మెరుగ్గా ఉన్నాయి. దాయాది దేశం పాక్ మాత్రం మన కంటే వెనుకబడి ఉంది.

గడిచిన 25 ఏళ్లలో ఆరోగ్య నాణ్యత ప్రమాణాలలో మెరుగుదల ఉన్నప్పటికీ, ఆయా దేశాల మధ్య అసమానత్వం పెరిగిందని ప్రపంచ ఆరోగ్య సంస్థ నివేదిక రూపకల్పనలో సభ్యుడైన క్రిస్టోఫర్ వ్యాఖ్యానించారు. అలాగే క్షయ, డిఫ్తీరియా, దగ్గు, టెటానస్, మీజిల్స్, కేన్సర్ గుండె సంబంధ సమస్యలు, మహిళల ప్రసవం, నవజాత శిశువుల్లో వ్యాధులు కారణంగా ఎక్కువ మరణాలు సంభవించినట్లు గుర్తించారు.