శశి థరూర్ ట్వీటిన పదానికి అర్థం ఇదే.. అసలు పరమార్థం వేరే!

కాంగ్రెస్ సీనియర్ నేత శశి థరూర్ తన దైన చర్యలతో తరచూ వార్తల్లో నిలిచే విషయం తెలిసిందే. సోషల్ మీడియాలో యాక్టివ్‌గా ఉండే ఈ నేత ఆసక్తికర ట్వీట్లతోనూ కవ్విస్తుంటారు. అంతేకాకుండా తన అభిమానులు, నెటిజన్లకు అప్పుడప్పుడూ ఆంగ్లంలో సరికొత్త పదాలను కూడా పరిచయం చేస్తుంటారు. తాజాగా ఆయన ‘floccinaucinihilipilification’ అనే సరికొత్త పదాన్ని ట్వీట్ చేశారు. అయితే.. దీనికి అసలు అర్థం వేరే ఉన్నా.. శశి థరూర్ ఈ పదాన్ని తనదైన శైలిలో మోదీపై తాను రాసిన కొత్త పుస్తకానికి ప్రచారాస్త్రంగా వాడుకున్నారు.

శశి థరూర్ ట్వీట్ చేసిన floccinaucinihilipilification పదానికి అర్థం తెలుసుకోడానికి నెటిజన్లు గూగుల్‌లో తెగ సెర్చ్ చేశారు. ఈ 29 అక్షరాల పదాన్ని ఉచ్ఛరించడానికే చాలా మంది ఇబ్బందిపడ్డట్టు తెలిపారు. దేన్నైనా విలువలేనిదిగా కొట్టిపారేసే సందర్భాల్లో ఈ పదాన్ని ఉపయోగిస్తారని ఆక్స్‌ఫర్డ్ డిక్షనరీ చెబుతోంది.

floccinaucinihilipilification అర్థం గురించి నెటిజన్లు తెగ వెతుకుతూ ఉండగా.. శశి థరూర్ మరో ట్వీట్ చేశారు. ఈసారి ఏకంగా 35 అక్షరాల పదం ‘Hippopotomonstrosesquipedaliophobia’ ను పరిచయం చేశారు. ‘నిన్న నేను చేసిన ఓ ట్వీట్ అంటువ్యాధిలా మిమ్మల్ని భయపెట్టి ఉంటే.. ఐ యామ్ సారీ’ అంటూ వ్యాఖ్యానించారు. కానీ, The Paradoxical Prime Minister పుస్తకంలో పారడాక్సికల్ కంటే పొడవైన పదాలు మాత్రం ఉండవు లెండి అంటూ థరూర్ వివరించారు. పారడాక్సికల్ అంటే ‘పరస్పర విరుద్ధమైన’ అని అర్థం.


అంటే.. శశి థరూర్ ఈ పదాలను ఎందుకు పరిచయం చేశారో అర్థమైంది కదా. అదేనండి తాను రాసిన కొత్త పుస్తకం ‘ది పారడాక్సికల్ ప్రైమ్ మినిస్టర్’ గురించి ప్రచారం చేసుకోవడానికి ఇదంతా చేశారన్నమాట. ఆయన ఊహించినదాని కంటే ఎక్కువ ఫలితమే దక్కింది. 400 పేజీలతో ప్రధాని మోదీపై రాస్తున్న ఈ పుస్తకానికి ఫుల్ పబ్లిసిటీ వచ్చింది. అంతేకాదు.. నెటిజన్లు కూడా తమదైన శైలిలో చమత్కరిస్తూ మరింత ఆసక్తికరమైన ట్వీట్లు చేశారు.

వింతలకే వింత అని ఊరికే అన్నారా!
శశి థరూరా.. మజాకా! అందుకే ఆయణ్ని కొంత మంది వింతలకే వింత అని చమత్కరిస్తుంటారు. రాజకీయాల్లో ఎంత బిజీగా ఉన్నా.. ట్విటర్‌లో యాక్టివ్‌గా ఉండే థరూర్.. కొన్నేళ్ల కిందటి వరకూ ఇలాగే ఆంగ్లంలో కొత్త పదాలను పరిచయం చేసేవారు. ఆ తర్వాత వాటికి అర్థాలు కూడా వివరించేవారు.

lalochezia, farrago, rodomontade, webaqoof, snollygoster లాంటి పదాలను శశి థరూర్ ఇలాగే పరిచయం చేశారు. ఇంతకీ Hippopotomonstrosesquipedaliophobia పదానికి అర్థం చెప్పలేదు కదూ! ‘పొడవైన పదాలకు సంబంధించిన ఫోబియా’ అని దీనికి అర్థం. థరూర్ కొత్త పుస్తకం విషయం ఏమోగానీ.. ఓ నాలుగు ఆంగ్ల పదాలకైతే అర్థం తెలిసిన ఆనందం దక్కింది కదూ!