మన వ్యాక్సిన్ సూపర్.. అందరూ తీసుకోండి: ఆరోగ్య శాఖ

కరోనా వైరస్‌కు అడ్డుకట్ట వేయడానికి భారత్ అభివృద్ధి చేస్తున్న వ్యాక్సిన్ ఇతర దేశాల కంటే సమర్థమైనదని కేంద్ర ఆరోగ్య శాఖ తెలిపింది. రోజుల వ్యవధిలోనే ఈ టీకా అందుబాటులోకి రానుందని వెల్లడించింది. తొలి విడతలో 30 కోట్ల మందికి వ్యాక్సిన్‌ను అందజేయనున్నట్లు కేంద్రం ఇప్పటికే ప్రకటించింది. ఆరోగ్య శాఖ ఇందుకు సంబంధించిన మార్గదర్శకాలను, సందేహాల నివృత్తి కోసం వివరాలను ఓ ప్రకటనలో విడుదల చేసింది.


కరోనా సోకినా, సోకకపోయినా.. అందరూ వ్యాక్సిన్ తీసుకుంటే మంచిదని ఆరోగ్య శాఖ స్పష్టం చేసింది. అయితే.. అది పూర్తిగా ఆయా వ్యక్తుల అంగీకారంతోనే జరుగుతుందని, టీకా కావాలని కోరుకునేవారే వేయించుకోవచ్చని తెలిపింది. పూర్తి మోతాదులో వ్యాక్సిన్ తీసుకున్నవారి శరీరంలో రెండు వారాల్లో యాంటీబాడీలు ఉత్పత్తి అవుతాయని.. ఇవి భవిష్యత్తులో కరోనా వైరస్ బారిన పడకుండా రక్షణ కల్పిస్తాయని వివరించింది.

కరోనా మహమ్మారి నుంచి పూర్తి రక్షణ పొందేందుకు, సమాజంలో దాని వ్యాప్తిని పూర్తిగా అరికట్టేందుకు ప్రతి ఒక్కరూ నిర్దేశిత మోతాదులో వ్యాక్సిన్ తీసుకోవాల్సిన అవసరం ఉందని కేంద్ర ఆరోగ్య శాఖ అభిప్రాయపడింది. తద్వారా కుటుంబసభ్యులు, బంధువులు, స్నేహితులు, తోటి ఉద్యోగులకు వైరస్ సోకకుండా నివారించవచ్చని వివరించింది.

దేశంలో వ్యాక్సిన్‌ ప్రయోగాలు చివరి దశలో ఉన్నాయని ఆరోగ్య శాఖ తెలిపింది. వ్యాక్సిన్‌ రోజుల వ్యవధిలోనే అందుబాటులోకి వస్తోందని.. వచ్చిన వెంటనే పంపిణీ చేసేందుకు కేంద్ర ప్రభుత్వం అన్ని ఏర్పాట్లు చేస్తోందని వెల్లడించింది.

దేశీయంగా ఆరు ఫార్మా సంస్థల క్లినికల్‌ ట్రయల్స్ తుది దశలో వివిధ దశలో ఉన్నాయని కేంద్ర ఆరోగ్య శాఖ తెలిపింది.

ఆ ఆరు వ్యాక్సిన్లు ఇవే..
1. ఐసీఎంఆర్‌ - భారత్‌ బయోటెక్‌
2. జైడస్‌ క్యాడిలా
3. జెన్‌నోవా
4. ఆక్స్‌ఫర్డ్‌ వ్యాక్సిన్‌ - సీరమ్‌ ఇన్‌స్టిట్యూట్‌ ఆఫ్‌ ఇండియా
5. స్పుత్నిక్‌ వీ-డాక్టర్‌ రెడ్డి ల్యాబ్స్‌
6. బయోలాజికల్‌ ఇ-లిమిటెడ్‌

Also Read:

✦ కరోనా వ్యాక్సిన్: కామన్ డౌట్స్ - సమాధానాలు

✦ కరోనా వ్యాక్సిన్ కోసం ఎలా రిజిస్ట్రేషన్ చేసుకోవాలి?