వీడెక్కడి దొంగ..? రోడ్డునే తవ్వేసి అమ్మేశాడు

దోపిడీకి కొత్త భాష్యం చెప్పాడు.. చైనాకి చెందిన ఓ ఘరానా దొంగ. గ్రామస్తులు నడిచే రోడ్డునే రాత్రికి రాత్రి తవ్వేసి కాంక్రీట్ మొత్తాన్ని లారీల్లో తరలించేశాడు. ఇలా ఒక రాత్రిలోనే తమ గ్రామానికి చెందిన రోడ్డు మాయమవడంతో ఆందోళన చెందిన గ్రామస్తులు పోలీసులకి ఫిర్యాదు చేయడంతో ఈ వార్త వెలుగులోకి వచ్చింది. జియాంగ్సు ప్రావిన్స్‌లోని సాంకేషు గ్రామంలో ఈ వింత దొంగతనం చోటు చేసుకుంది.

రాత్రికి రాత్రే రోడ్డుని తవ్వేసి ఉండటంతో.. మొదట ఎవరైనా నిరసనకారులు ఉద్దేశపూర్వకంగా ఇలా చేసి ఉంటారని గ్రామస్తులు అనుకున్నారు. కానీ.. పోలీసులు నిశితంగా దర్యాప్తు చేయడంతో చైనాకి చెందిన ఝూ అనే దొంగ ఈ పనిచేసినట్లు నిర్ధారించారు. పక్కా ప్లాన్‌తో రోడ్డుని తవ్వే యంత్రాన్ని వినియోగించిన ఝూ.. లారీలతో కాంక్రీట్ మొత్తాన్ని తరలించేయడం అందర్నీ ఆశ్చర్యపరుస్తోంది. వార్త తెలిసిన వాళ్లు వీడెక్కడి దొంగరా..? అంటూ నోరెళ్లబెడుతున్నారు.