అంతర్జాతీయ ఉగ్రవాదికి పాక్ ఘన స్వాగతం!

అమెరికాను తమకు మిత్ర దేశంగా పేర్కొనే పాకిస్థాన్ ఆ దేశాన్ని ఘోరంగా అవమానించింది. హిజ్బుల్ ముజాయిద్దీన్ చీఫ్ సయ్యద్ సలాహుద్దీన్‌ను అంతర్జాతీయ ఉగ్రవాదిగా పేర్కొంటూ అమెరికా వారం రోజుల కిందట ప్రకటించింది. గతవారం అమెరికాలో పర్యటించిన భారత ప్రధాని నరేంద్రమోదీతో భేటీకి ముందు ట్రంప్ ప్రభుత్వం ఈ ప్రకటన చేసింది. అయితే అమెరికా గ్లోబల్ టెర్రరిస్ట్‌గా ప్రకటించిన సలాహుద్దీన్‌కు పాక్‌ ప్రభుత్వం ఘన స్వాగతం పలికింది. అంతే కాదు అతడికి భారీ భద్రత కల్పించింది.

అమెరికా ప్రకటన తర్వాత తొలిసారిగా పాక్ ఆక్రమిత కశ్మీర్‌లోని ముజఫరాబాద్‌ ప్రెస్ క్లబ్‌లో సలాహుద్దీన్ మీడియా సమావేశం నిర్వహించాడు. దీనికి పాక్ ప్రభుత్వం భారీ భద్రత కల్పించడాన్ని చూసి ప్రపంచం విస్తుపోయింది. తాజా వైఖరితో ఉగ్రవాదులపై పాకిస్థాన్‌కు ఉన్న ప్రేమ మరోమారు బహిర్గతమైంది. అంతే కాదు సలాహుద్దీన్‌కు ప్రజలు ఘన స్వాగతం పలకడం, అతడి ప్రెస్‌మీట్‌కు ప్రభుత్వం భారీ భద్రత కల్పించడాన్ని చూస్తే ఉగ్రవాదులకు పాక్ భూతల స్వర్గమన్న విషయం మరోసారి తేటతెల్లమైందని పేర్కొంటున్నారు. సలాహుద్దీన్ విషయంలో పాక్ చర్యలు అమెరికాను ఘోరంగా అవమానించడమేనని అంటున్నారు.

భారత్ నుంచి కశ్మీర్‌కు స్వేచ్ఛ కలిగించడంలో తమ పోరాటం ఆగదని సలాహుద్దీన్ ఈ సందర్భంగా ప్రకటించారు. అంతేకాదు కశ్మీర్‌లో కేవలం భారత సైన్యాన్ని హిజ్బుల్ ముజాయిద్దీన్ మాత్రమే లక్ష్యంగా చేసుకుందని, ఐఎస్, అల్‌ఖైదాలు అక్కడ లేవని ప్రకటించాడు. డోనాల్డ్ ట్రంప్ నిర్ణయాలను ఎవరైనా న్యాయస్థానంలో సవాల్ చేస్తే వాటిని పట్టించుకోరని, అలాగే ఇతర పశ్చిమ దేశాలు కూడా అతడి అభిప్రాయాలతో ఏకీభవించవని పేర్కోవడం గమనార్హం. స్వతంత్రంగా ఉండటానికి లేదా పాక్‌లో వీలీనానికి కశ్మీరీ ప్రజల అభిప్రాయం తెలుసుకోడానికి తీర్మానాలను ప్రతిపాదించాలని ఐక్యరాజ్యసమితిని కోరారు. రష్యా, లేదా చైనా దీనిపై హామీ ఇచ్చినట్లయితే భారత్‌తో శాంతిపూర్వక చర్చలకు హిజ్బుల్ ముజాయిద్దీన్ సిద్ధంగా ఉందని అన్నాడు.