పళనిస్వామి పెళ్లి చాణక్యం.. దినకరన్‌కు షాక్!

రాజకీయ నాయకుడంటే.. అంది వచ్చిన ప్రతి అవకాశాన్ని ఉపయోగించుకోవాలి. శత్రువును దెబ్బకొట్టడానికి, తాను నిలదొక్కుకోవడానికి ఏం చేయాలో అన్నీ చేయాలి. తమిళనాడు ముఖ్యమంత్రి పళనిస్వామి ఈ విషయంలో ఆరితేరారు. పన్నీరు సెల్వం వర్గాన్ని తనవైపు తిప్పుకోవడం ద్వారా సీఎం పీఠాన్ని కాపాడుకున్న ఆయన.. దినకరన్‌ను దెబ్బకొట్టేందుకు ఓ పెళ్లిని వాడుకున్నారు. ఇంతకూ ఆయన ఏం చేశారంటే..?

తలవాయి సుందరం అనే వ్యక్తి దినకరన్‌కు నమ్మిన బంటు. ఆయన ఢిల్లీలో తమిళనాడు ప్రత్యేక ప్రతినిధిగా వ్యవహరిస్తున్నారు. కేబినెట్ హోదా ఉన్న పదవి అది. అన్నాడీఎంకే పార్టీకి చెందిన 19 మంది ఎమ్మెల్యేలు.. దినకరన్ తన వైపు తిప్పుకున్నాడు కదా. వీరిని ఉపయోగించుకొని ప్రభుత్వాన్ని పడగొట్టాలనేది ఆయన ప్లాన్. ఈ విషయంలో దినకరన్‌తో సుందరం వ్యతిరేకించారు. ప్రభుత్వాన్ని పడగొట్టవద్దని దినకరన్‌కు సూచించారు. దీంతో చిర్రెత్తుకొచ్చిన దినకరన్.. నాకే నీతులు చెబుతావా.. నేను చేసే పని నచ్చకపోతే నీ పదవికి రాజీనామా చేయ్. నా వల్లే నీకు ఆ పదవి దక్కిందంటూ ఆగ్రహం వ్యక్తం చేశారు.

సరే.. ఎలాగో ఆ పదవితో ఒరిగేదేం లేదని చెప్పి సుందరం రాజీనామాకు సిద్ధపడ్డారు. అప్పటికే ఎమ్మెలేలు వ్యతిరేక వర్గంలో చేరడంతో పళనిస్వామి వర్గం కాస్త టెన్షన్‌గా ఉంది. సీఎం ఆఫీసుకెళ్లిన సుందరం వెళ్లి తాను రాజీనామా చేస్తున్నట్లు పళనిస్వామికి చెప్పారు. ఆ లేఖను తీసుకొని చింపి పడేసిన పళనిస్వామి.. నువ్వేం రాజీనామా చేయాల్సిన అవసరం లేదు. ఆ పదవిలో నువ్వే ఉండాలి. పార్టీలో గొడవల్ని వదిలేసి నీ కూతురి పెళ్లి ఉంది కదా. ఆ పనులు చూడంటూ భరోసా ఇచ్చారు. అప్పటికే తన భార్య కూడా దగ్గర లేకపోవడంతో సుందరం కాస్త దిగాలుగా ఉన్నారు. నీ కూతురి పెళ్లి, రిసెప్షన్‌కు వస్తామని కూడా పళనిస్వామి చెప్పారు. చెప్పినట్టుగానే పన్నీరు సెల్వం, ఇతర కేబినెట్ సహచరులతో హాజరై వధువరుల్ని ఆశీర్వదించారు.

పళనిస్వామి వైఖరితో ఫిదా అయిన సుందరం ఆయన వర్గంలో చేరిపోయాడు. తొందరపాటు కారణంగా దినకరన్ తన నమ్మిన బంటును దూరం చేసుకున్నాడు. నేను ఉన్నానని భరోసా ఇచ్చి, బిడ్డ పెళ్లికి హాజరవడం ద్వారా పళనిస్వామి సుందరాన్ని తనవైపు తిప్పుకున్నాడు. అదే మరి రాజకీయ చాతుర్యం అంటే..!