ఆయుధం కన్నా హాస్యం శక్తివంతమైంది

హాస్యం, వ్యంగ్యం వంటివి మంచి ఔషదాలని... అవి కోపం.. ఇతర ఆయుధాల కంటే ఎంతో శక్తివంతమైనవని ప్రధానమంత్రి నరేంద్రమోదీ పేర్కొన్నారు. దివంగత చో రామస్వామి స్థాపించిన తుగ్లక్‌ పత్రిక 47వ వార్షికోత్సవంలో ఆయన పాల్గొని ప్రసంగించారు. పాత్రికేయులకు ఉండాల్సిన లక్షణాల్లో హాస్యం, వ్యంగ్యం ముఖ్యమైనవని మోదీ సూచించారు. మన జీవితాల్లో సంతోషాన్ని తీసుకొచ్చేందుకు మరింత హాస్యం, వ్యంగ్యం అవసరమన్నారు. హాస్యం మానవ సంబంధాలను, సామాజిక సంబంధాలను, సమాజాల మధ్య సంబంధాలను మరింత పెంచుతుందని.. నేటి రోజుల్లో ఇది చాలా అవసరమని అభిప్రాయపడ్డారు. తన మిత్రుడు చో రామస్వామి వ్యంగ్యం, హాస్యంలో నిపుణుడని గుర్తుకు తెచ్చుకున్నారు. ఆయన మరణం తనకు తీరని నష్టమని మోదీ పేర్కొన్నారు.

‘‘హాస్యం ఎలాంటి అడ్డుగొడలనైనా చెరిపేస్తుంది. అది మన జీవితాల్లో సంతోషాన్ని నింపుతుంది. ఇదే మంచి ఔషదం. అసహనం, కోపం ఇతర శక్తివంతమైన ఆయుధాలకంటే హాస్యం లేదా నవ్వే ఎన్నోరెట్లు శక్తివంతమైనది’’ అని మోదీ తెలిపారు.

ఈ సందర్భంగా సూపర్ స్టార్ రజనీకాంత్ మాట్లాడుతూ చో రామస్వాతితో ఉన్న అనుబంధాన్ని పంచుకున్నారు.