ఆయన ఆవులతో మాట్లాడిస్తారట..!

స్వామి నిత్యానంద పేరు చెప్పగానే నటి రంజితతో ఆయన రాసలీలల వీడియో గుర్తొస్తుంది. వీరిద్దరూ ఏకాంతంగా గడుపుతున్న వీడియో వెలుగులోకి రావడం అప్పట్లో సంచలనం సృష్టించింది. ఇటీవలే ఐన్‌స్టీన్ సాపేక్ష సిద్ధాంతాన్ని తప్పుబట్టిన ఆయన.. తాజాగా ఆవులతో మాట్లాడిస్తానంటున్నారు. అవును మీరు విన్నది నిజమే.. ఆవులు, ఎద్దులతో సంస్కృతం, తమిళంలో మాట్లాడిస్తానని నిత్యానంద చెబుతున్నారు.

ఓ సాఫ్ట్‌వేర్ ద్వారా జంతువులతో మాట్లాడించొచ్చని నిత్యానంద సెలవిస్తున్నారు. ప్రస్తుతం అది ప్రయోగ దశలో ఉందట. తన మాటలను కొట్టిపారేయొద్దని, ఏడాది తర్వాత ఈ ప్రయోగం చేసి చూపిస్తానని ఆయన నమ్మకంగా చెప్పారు. కావాలంటే తన మాటల్ని రికార్డు చేసుకోమని ఆయన చెప్పడం విశేషం.

వాస్తవానికి మనుషులు మినహా ఇతర జంతువుల్లో స్వరపేటికలు ఉండవు. మరి వాటితో మాట్లాడించడం ఎలా సాధ్యం అని ప్రశ్నిస్తే.. సూపర్‌కాన్షియస్ పరిశోధన ద్వారా ఇది సాధ్యం చేస్తానని నిత్యానంద ధీమాగా చెప్పారు. అంతే కాదు స్వరతంత్రులను రూపొందించడం ద్వారా కోతులు, సింహాలు, పులులతోనూ ఆయన మాట్లాడిస్తారట.