మోదీ అంటే ఇష్టమే.. అమిత్ షా అంటేనే..: మమత

నిన్నటి వరకు మోదీ ప్రభుత్వం, బీజేపీపై నిప్పులు చెరిగిన పశ్చిమ బెంగాల్ ముఖ్యమంత్రి మమతా బెనర్జీ ఉన్నట్టుండి మనసు మార్చుకున్నారు. ఏమైందో ఏమోగానీ ప్రధాని నరేంద్ర మోదీని పొగుడుతూ మాట్లాడారు. నరేంద్ర మోదీ అంటే తనకు ఎంతో అభిమానమని, ఆయనతో ఎలాంటి సమస్యా లేదన్నారు. కాకపోతే అమిత్ షా‌తోనే ఇబ్బంది అని చెప్పారు. ఆయన నియంతృత్వ తరహా వాతావరణంతో చాలా ఇబ్బందిగా ఉందంటూ బీజేపీ జాతీయ అధ్యక్షుడిగా వాగ్బాణాలను సందించారు మమత. పార్టీ అధ్యక్షుడు ప్రభుత్వ వ్యవహారాల్లో కలుగజేసుకుని దేశంలో ‘సూపర్ డిక్టేటర్‌షిప్’ వాతావరణాన్ని తీసుకొస్తున్నారని అమిత్‌ షాపై మండిపడ్డారు. శనివారం ఓ టీవీ చానల్‌కు ఇచ్చిన ఇంటర్వ్యూలో మమత ఈ వ్యాఖ్యలు చేశారు.

ఈ సందర్భంగా మాజీ ప్రధాని అటల్ బిహారీ వాజ్‌పేయిపై కూడా ప్రశంసలు జల్లు కురిపించారు. ‘వాజ్‌పేయి కూడా బీజేపీ వ్యక్తే. కానీ ఆయన చాలా సమతుల్యంగా, నిష్పక్షపాతంగా వ్యవహరించేవారు. ఆయనకింద పనిచేసినప్పుడు నేను ఎలాంటి సమస్యలు ఎదుర్కోలేదు’ అని మమత చెప్పుకొచ్చారు. అయితే ఇప్పటి పరిస్థితులపై మాట్లాడిన మమత.. బీజేపీపై ఆరోపణలు చేశారు కానీ, ప్రధానిని మాత్రం పన్నెత్తి మాట అనలేదు. ‘మేం ప్రస్తుతం ఇన్ని సమస్యలు ఎందుకు ఎదుర్కొంటున్నాం? ఈ విషయంలో ప్రధానిని ఆరోపించను కానీ ఆయన పార్టీ మాత్రం జాగ్రత్తగా ఉండాలి. ఎందుకు ఆయన పార్టీ అందరికీ సమస్యలు తెచ్చిపెడుతోంది?’ అని బీజేపీపై మండిపడ్డారు.

అలాగే బీజేపీ జాతీయ అధ్యక్షుడు అమిత్ షాను టార్గెట్ చేస్తూ పలు విమర్శలు చేశారు. ‘అందరూ తీవ్ర భయాందోళనలకు గురువుతున్నారు. ఎవరైనా ఏదైనా అనగానే కేంద్రం ఈడీని, సీబీఐని, ఆదాయపన్ను శాఖను వారి ఇళ్లమీదకి వదులుతోంది. ఇలాంటి పరిస్థితుల్లో ప్రతిపక్షాలు ఎలా బలోపేతమవుతాయి? దేశంలో సూపర్ డిక్టేటర్‌షిప్ నడుస్తోంది. ఒక పార్టీ అధ్యక్షుడు మంత్రులతో మీటింగ్ ఎలా నిర్వహిస్తారు? మన ప్రధాని ఎవరు మోదీనా.. అమిత్ షానా?’ అని మమత ఆగ్రహం వ్యక్తం చేశారు. ‘నాకు మోదీ అంటే అభిమానమే.. కానీ అమిత్ షా అంటేనే లేదు’ అని కుండబద్దలుకొట్టారు.