ఎయిర్ ఫోర్స్ విమానం మిస్సింగ్.. 13 మంది దుర్మరణం?

ఇండియన్ ఎయిర్‌ఫోర్స్‌కు చెందిన ఏఎన్-32 రవాణా విమానం సోమవారం ఆచూకీ లేకుండా పోయింది. అసోంలోని జొర్హాట్ ఎయిర్‌బేస్ నుంచి టేకాఫ్ అయిన విమానం మధ్యాహ్నం 12.27 గంటలకు జొర్హాట్ నుంచి అరుణాచల్‌లోని మెంచుకా అడ్వాన్స్ ల్యాండింగ్ గ్రౌండ్‌కు బయల్దేరింది. ఆ సమయంలో విమానంలో 8 మంది సిబ్బంది, ఐదుగురు ప్రయాణికులు ఉన్నారు. మధ్యాహ్నం 1 గంట నుంచి విమానానికి గ్రౌండ్ ఏజెన్సీలతో సంబంధాలు తెగిపోయాయి.

ఆచూకీ లేకుండా పోయిన విమానం విషయమై రక్షణ మంత్రి రాజ్‌నాథ్ సింగ్ ఆరా తీశారు. ఐఏఎఫ్ ఎయిర్ మార్షల్ రాకేశ్ సింగ్‌తో ఆయన మాట్లాడారు.
ఏసీ-130 హెర్క్యులస్ ఎయిర్ క్రాఫ్ట్, ఏఎన్-32 ఎయిర్ క్రాఫ్ట్, రెండు ఎంఐ-17 హెలికాప్టర్లు తప్పిపోయిన విమానం ఆచూకీ కోసం గాలిస్తున్నాయి. సుఖోయ్-30 యుద్ధ విమానాలు కూడా రంగంలోకి దిగాయి. ఆర్మీ కూడా గాలింపు చర్యలు చేపడుతోంది. ఇప్పటి వరకూ విమాన శిథిలాలు లభ్యం కాలేదు. కాగా అరుణాచల్ ప్రదేశ్‌లోని వెస్ట్ సియాకు జిల్లాలోని టాటోకు ప్రాంతంలో విమానం కూలిపోయిందని సమాచారం.