హైవేపై దిగిన యుద్ధ విమానాలు!

భారత యుద్ధ విమానాలు రోడ్డెక్కాయి. భారత వాయుసేనకు చెందిన సుమారు 20 యుద్ధ విమానాలు మంగళవారం ఉదయం లక్నో-ఆగ్రా ఎక్స్‌ప్రెస్‌వేపై ల్యాండ్ అయ్యి మళ్లీ టేకాఫ్ తీసుకున్నాయి. వీటిలో మిరేజ్-2000, సుఖోయ్-30 ఎంకేఐ జెట్ విమానాలతో పాటు సి-130జె సూపర్ హెర్య్యులస్ ట్రాన్స్‌పోర్ట్ ప్లేన్ కూడా ఉంది. ఉత్తరప్రదేశ్‌లోని లక్నోకు 65 కిలోమీటర్ల దూరంలోని ఉన్నావ్ జిల్లా బంగార్‌మౌ వద్ద ఇండియన్ ఎయిర్‌ఫోర్స్ విన్యాసాలను చేపట్టింది.

లక్నో-ఆగ్రా ఎక్స్‌ప్రెస్‌వేపై అధికారికంగా నిర్వహించిన తొలి వాయుసేన విన్యాసాలు ఇవి. ఉత్తరప్రదేశ్ ప్రభుత్వ సహకారంతో వాయుసేన ఈ విన్యాసాలు నిర్వహిస్తోంది. ఈ ఎక్స్‌ప్రెస్‌వేను గతేడాది నవంబర్‌లో ప్రారంభించారు. అత్యవసర సమయాల్లో యుద్ధ విమానాలు ల్యాండ్ అవడానికి వీలుగా ఈ హైవేను నిర్మించారు. యుద్ధ సమయాల్లో అత్యవసరంగా పరిస్థితుల్లో ప్రజా రవాణాకు వాడే రోడ్లకు ఉపయోగించుకోవడమే దీని ఉద్దేశం. ఈ మేరకు మంగళవారం రిహార్సల్స్ నిర్వహించారు.

రక్షణ మంత్రిత్వ శాఖ ప్రటకన ఆధారంగా.. ఇండియన్ ఎయిర్‌ఫోర్స్‌కు చెందిన మొత్తం 20 విమానాలు (ఫైటర్, ట్రాన్స్‌పోర్ట్) ఎక్స్‌ప్రెస్‌వేపై దిగుతాయి. వీటిలో మిరేజ్-2000, జాగ్వార్, సుఖోయ్, ఎన్-32, సి-130జె ట్రాన్స్‌పోర్ట్ విమానాలు ఉన్నాయి. అయితే వీటన్నిటిలో 35 టన్నుల సి-130 సూపర్‌ హెర్క్యులస్‌ విమానం ప్రధాన ఆకర్షణగా నిలిచింది. గరుడ్‌ కమాండోలను సంక్షోభ ప్రాంతాలకు తరలించే విన్యాసాల్లో భాగంగా ఈ భారీ విమానం ల్యాండ్‌ అయ్యింది. ఇంత పెద్ద యుద్ధ విమానాన్ని రోడ్డుపై చూసేసరికి అక్కడున్న సామాన్య ప్రజలు కేరింతలు కొట్టారు.