అగ్నిపథ్‌కు విశేష స్పందన.. 6 రోజుల్లో ఎన్ని దరఖాస్తులో తెలుసా?

భారత త్రివిధ దళాల్లో (ఇండియన్ ఆర్మీ, ఇండియన్ నేవీ, ఇండియన్ ఎయిర్ ఫోర్స్) నియామకాల కోసం కేంద్ర ప్రభుత్వం ప్రవేశ పెట్టిన ‘అగ్నిపథ్‌ (Agnipath)’ పథకానికి మంచి స్పందన లభిస్తోంది. Indian Air Force నియామకాల కోసం ఇప్పటికే దరఖాస్తు ప్రక్రియ ప్రారంభమైన సంగతి తెలిసిందే. జూన్‌ 24న ఆన్‌లైన్ రిజిస్ట్రేషన్‌ ప్రక్రియ ప్రారంభం కాగా.. కేవలం 6 రోజుల వ్యవధిలోనే 1 లక్షా 83 వేల దరఖాస్తులు వచ్చినట్లు అధికారులు వెల్లడించారు. వచ్చే 6 రోజుల్లో ఈ సంఖ్యకు రెట్టింపు దరఖాస్తులు వస్తాయని భావిస్తున్నారు. ఇందుకు సంబంధించిన రిజిస్ట్రేషన్ల ప్రక్రియ జులై 5న ముగుస్తుంది. చివరి రోజుల్లో ఎక్కువ మంది అభ్యర్థులు రిజిస్ట్రేషన్ చేసుకునే అవకాశం ఉంది.

త్రివిధ దళాల నియామకాల్లో సంస్కరణల్లో భాగంగా కేంద్రం ‘అగ్నిపథ్’ స్కీమ్‌ను తీసుకొచ్చింది. పదిహేడున్నర ఏళ్ల నుంచి 21 సంవత్సరాల గల యువకులు https://agnipathvayu.cdac.in వెబ్‌సైట్‌ ద్వారా దరఖాస్తు చేసుకోవచ్చు. నాలుగేళ్లు పూర్తయ్యాక అభ్యర్థుల్లో 25 శాతం మంది అగ్నివీరులను ఉద్యోగాల్లో కొనసాగిస్తామని కేంద్రం పేర్కొంది. ఉత్తమ ప్రతిభ కనబర్చిన వారిని ఇండియన్ ఆర్మీ, ఇండియన్ నేవీ, ఇండియన్ ఎయిర్ ఫోర్స్‌లోకి తీసుకుంటామని ప్రకటించింది.

కొవిడ్ సంక్షోభం కారణంగా త్రివిధ దళాల్లో రెండేళ్లుగా నియామకాలు చేపట్టకపోవడంతో ఈ ఏడాది రిక్రూట్మెంట్‌లో గరిష్ఠ వయోపరిమితిని 23 ఏళ్లకు పెంచారు. దరఖాస్తుల సంఖ్య పెరిగడానికి ఇది కూడా ఒక కారణం. అగ్నిపథ్‌కు వ్యతిరేకంగా దేశంలోని పలు ప్రాంతాల్లో ఓ వైపు నిరసన కొనసాగుతుండగానే.. మరోవైపు ఈ పథకానికి దరఖాస్తు చేసుకునే వారి సంఖ్య సైతం పెరుగుతుండటం గమనార్హం.

Also Read:

✦ దేశంలో 50 రాష్ట్రాలు ఏర్పాటు చేయాలని మోదీ భావిస్తున్నారు: కర్ణాటక మంత్రి