IAS టాపర్ల ప్రేమ బంధానికి బీటలు.. కలిసి బతకలేకపోయారు!

ఐఏఎస్ టినా దాబి, అథర్ ఖాన్. 2018లో ప్రేమ పెళ్లితో వార్తల్లో ప్రముఖంగా నిలిచిన జంట ఇది. 2015లో సివిల్ సర్వీస్ పరీక్షలో టినా దాబి టాపర్‌గా నిలవగా.. అథర్ ఖాన్ ఆలిండియా రెండో ర్యాంక్ సాధించడమే అందుక్కారణం. అంతేకాదు.. వీరిద్దరి నేపథ్యాలు వేరు, ప్రాంతాలు వేరు.. అంతకంటే ముఖ్యంగా మతాలు వేరు. ముస్సోరిలో ఐఏఎస్ ట్రెయినింగ్‌లో ఉండగా.. తొలిచూపులోనే ప్రేమలో పడ్డారు. ఆ తర్వాత పెద్దలను ఒప్పించి పెళ్లి చేసుకున్నారు. తాజాగా విడాకులకు దరఖాస్తు చేసుకున్నారు. మళ్లీ వార్తల్లో ప్రముఖంగా నిలిచారు.

పెళ్లైన రెండేళ్లకే టినా, అథర్ ఖాన్ విడాకులకు దరఖాస్తు చేసుకోవడం చర్చనీయాంశంగా మారింది. ఇరువురు పరస్పర సంప్రదింపులతో డివోర్స్‌కు అప్లై చేసుకున్నట్లు ఇండియా టుడే ఓ కథనంలో పేర్కొంది. కొద్ది రోజులుగా వీరి మధ్య భేదాభిప్రాయాలు వచ్చినట్లు తెలుస్తోంది. దీంతో జైపూర్ ఫ్యామిలీ కోర్టులో విడాకులకు దరఖాస్తు చేసుకున్నారు.

వివాహమైన తర్వాత కొన్ని రోజుల పాటు ఈ దంపతులు అన్యోన్యంగా ఉన్నారు. పెళ్లి తర్వాత టినా దాబి తన పేరు చివరన ‘ఖాన్’ జత చేసుకున్నారు. అయితే.. కొద్ది రోజుల కిందట టినా దాబీ ఖాన్ తన సోషల్ మీడియా అకౌంట్లలో తన పేరు చివరన ఖాన్ తొలగించారు. ఆ వెంటనే అథర్ ఖాన్ ఇన్‌స్టాగ్రామ్‌లో టినాను అన్‌ఫాలో అయ్యారు.

టీనా దాబి ఢిల్లీలో పుట్టి పెరిగారు. అథర్ ఖాన్‌ది జమ్మూ కశ్మీర్‌లోని అనంతనాగ్ సమీపంలో ఒక చిన్న గ్రామం. ఇద్దరివీ పూర్తిగా భిన్న ధ్రువాలు. కష్టపడి పైకొచ్చారు. చిన్న వయసులోనే జీవితంలో గొప్ప విజయం సాధించారు. టీనా తొలి ప్రయత్నంలోనే ఐఏఎస్ టాపర్‌గా నిలవగా.. అథర్ రెండో ప్రయత్నంలో రెండో ర్యాంక్ సాధించారు.

లవ్ ఎట్ ఫస్ట్ సైట్..
మొదటి, రెండో ర్యాంకులు సాధించిన వీరిద్దరినీ సన్మానించేందుకు ప్రభుత్వం 2015 మే 11న ముస్సోరీలో ఒక కార్యక్రమం నిర్వహించింది. ఆ రోజు ఉదయం అథర్ తొలిసారిగా టీనాను చూశారు. అదే రోజు సాయంత్రం ఆమె గది తలుపు తట్టారట. టీనాకు తన మనసులోని మాట చెప్పేశారు. టీనాను చూడగానే ప్రేమలో పడిపోయానని ఆ తర్వాత ఆయనే చెప్పారు. ‘లవ్ ఎట్ ఫస్ట్ సైట్’ అని తెలిపారు.


ఐఏఎస్ శిక్షణలో చెట్టాపట్టాల్..
ముస్సోరి అకాడమీలో ఐఏఎస్ శిక్షణకు వెళ్లిన తర్వాత వారి ప్రేమ బంధం మరింత దగ్గరైంది. తమ రిలేషన్‌షిప్‌ను ఓపెన్‌గానే చెప్పి ఇద్దరూ కలిసి ఉన్న ఫోటోలను సోషల్ మీడియాలో పోస్టు చేశారు. దీంతో చాలా మంది నెటిజన్లు ఆ జంటకు కంగ్రాట్స్ చెప్పారు. 2018లో వారిద్దరూ పెళ్లి బంధంతో ఒక్కటైన సందర్భంగా రాజకీయ, సినీ, క్రీడా రంగాలకు చెందిన ప్రముఖులు అభినందనలు తెలిపారు. ఆ జంట అందరికీ ఆదర్శం అని కొనియాడారు. దీంతో వారి పేర్లు దేశవ్యాప్తంగా మార్మోగిపోయాయి.

Also Read: లెటర్లు, పార్శిళ్ల ద్వారా కరోనా వైరస్.. కొత్త కుట్ర, ఇంటర్‌పోల్ హెచ్చరిక

Don't Miss: పాకిస్థాన్‌కు ఫ్రాన్స్ దిమ్మదిరిగే షాక్.. భారత్‌కు ప్రయోజనం

Must Read: నా తండ్రి మధ్యాహ్న భోజనం కాజేస్తున్నాడు.. కలెక్టర్‌కు బాలిక ఫిర్యాదు, కంటతడి పెట్టిస్తున్న ఘటన