పంజాబ్ సీఎంగా అమరిందర్ ప్రమాణం

పంజాబ్ ముఖ్యమంత్రిగా కెప్టెన్ అమరిందర్ సింగ్ గురువారం ప్రమాణస్వీకారం చేశారు. సీఎంతో పాటు ఎనిమిది మంది కేబినెట్ మంత్రులు కూడా ప్రమాణం చేశారు. వీరితో చండీఘర్‌లోని రాజ్‌భవన్‌లో గవర్నర్ విజయేంద్రపాల్ సింగ్ ప్రమాణం చేయించారు. ప్రమాణస్వీకారోత్సవానికి కాంగ్రెస్ ఉపాధ్యక్షుడు రాహుల్ గాంధీ, మాజీ ప్రధాని మన్మోహన్ సింగ్‌తో పాటు కాంగ్రెస్ పార్టీ ప్రముఖ నేతలు హాజరయ్యారు.

బీజేపీకి టాటా చెప్పి కాంగ్రెస్‌లో చేరి తూర్పు అమృత్‌సర్ నుంచి విజయం సాధించిన నవజోత్ సింగ్ సిద్ధు కేబినెట్‌లో స్థానం సంపాదించారు. కాగా, తాజాగా జరిగిన పంజాబ్ అసెంబ్లీ ఎన్నికల్లో కాంగ్రెస్ విజయం సాధించిన విషయం తెలిసిందే. మొత్తం 117 స్థానాలకు గాను కాంగ్రెస్ 77 సీట్లను సొంతం చేసుకుని ప్రభుత్వాన్ని ఏర్పాటుచేసింది.

ఇటీవల 75వ ఏట అడుగుపెట్టిన కెప్టెన్ అమరిందర్ సింగ్‌ను కాంగ్రెస్ సీఎం అభ్యర్థిగా ఎన్నికల్లో నిలబెట్టింది. ఆయన పటియాలా నియోజకవర్గం నుంచి ఘనవిజయం సాధించారు. తన 75వ పుట్టిన రోజు నాడే ఎన్నికల ఫలితాలు వెలువడటం, ఆయన గెలవడం విశేషం. ముఖ్యమంత్రిగా ప్రమాణం చేసిన అమరిందర్ సింగ్‌కు ప్రధాన మంత్రి నరేంద్ర మోదీ శుభాకాంక్షలు తెలిపారు.
Congratulations @capt_amarinder on taking oath as CM. Wishing you the very best in working for Punjab’s development. — Narendra Modi (@narendramodi) March 16, 2017