నిరుద్యోగ భృతి అందజేసే యోచనలో కేంద్రం?

ఉన్నత చదువులు అభ్యసించి ఉద్యోగాల్లో స్థిరపడని అభ్యర్థులకు నిరుద్యోగ భృతి అందజేసే యోచనలో కేంద్రం ఉన్నట్లు విశ్వసనీయ వర్గాల సమాచారం. ఐరోపా దేశమైన ఫిన్‌లాండ్‌ నిరుద్యోగ భృతిని 2000 సంవత్సరంలో మొదలుపెట్టి ఇప్పటికీ విజయవంతంగా అమలు చేస్తోంది. అంతర్జాతీయ ప్రాథమిక ఆదాయాన్ని పరిగణనలోకి తీసుకుని నిరుద్యోగ భృతిని కింది నెలకు 585 డాలర్లు చెల్లిస్తోంది.

ప్రపంచంలోనే అంతర్జాతీయ ప్రాథమిక ఆదాయాన్ని ప్రమాణికంగా తీసుకున్న ఏకైక దేశం ఫిన్‌లాండ్‌ మాత్రమే. ఇండియా, నెదర్లాండ్‌‌తోపాటు ఆఫ్రికా దేశమైన కెన్యాలు ఈ బాటలోనే నడవాలని భావిస్తున్నాయి. నిరుద్యోగ భృతిని చెల్లించడం వల్ల ఉద్యోగాల కోసం ప్రయత్నం చేయరనే వాదనలో నిజం లేదని, ఉద్యోగ అన్వేషణలో ఈ పథకం మరింత ప్రయోజకారిగా ఉంటుందని ప్రభుత్వ వర్గాలు తెలియజేస్తున్నాయి.

నిరుద్యోగ భృతి నుంచి పార్ట్‌టైమ్ ఉద్యోగులను మినహాయించలేదు కాబట్టి ఎక్కువ మంది వీటివైపు మొగ్గుచూపుతున్నారని ఆ వర్గాలు తెలిపాయి. అయితే నిరుద్యోగ భృతిని పొందుతున్న అభ్యర్థులు ఉన్నత ఉద్యోగాలనే కోరుకుంటున్నారని సామాజిక శాస్త్రవేత్తలు అంటున్నారు. నిరుద్యోగ భృతికి పన్ను పోటు లేకపోవడం, చిన్న ఉద్యోగాలు చేయడం వల్ల వచ్చే జీతం నుంచి సుంకాన్ని తగ్గిస్తే నిరుద్యోగ భృతి కంటే తక్కువ వస్తుందన్న అభ్యర్థుల ఆందోళలను నిపుణులు విశ్లేషిస్తున్నారు.