సరిహద్దుల్లో మితిమీరిన పాక్ ఆగడాలు.. ఈ ఏడాది 2,050 సార్లు కాల్పుల ఉల్లంఘన

కాల్పుల విరమణ ఒప్పందానికి తూట్లు పొడుస్తూ నిరంతరం సరిహద్దుల్లో భారత సైన్యం, గ్రామాలే లక్ష్యంగా పాకిస్థాన్ దాడులకు తెగబడుతోన్న విషయం తెలిసిందే. కశ్మీర్ విషయంలో భారత్ తీసుకున్న నిర్ణయంతో మరింత రగిలిపోతున్న దాయాది.. ఇటీవల కాలంలో తరుచూ కాల్పులకు తెగబడుతోంది. ఈ ఏడాది ఇప్పటి వరకు పాక్ 2,050 సార్లు కాల్పులకు తెగబడినట్టు విదేశాంగ శాఖ ఆదివారం ప్రకటించింది. సరిహద్దుల్లో ఉగ్రవాదుల చొరబాటుకు సహకరించడంతో సహా పాకిస్థాన్ సైన్యం నిరంతరం కాల్పుల విరమణ ఉల్లంఘనకు పాల్పడుతోందని, సైనిక పోస్టులు, భారత పౌరులనే లక్ష్యంగా చేసుకుందని విదేశాంగ శాఖ అధికార ప్రతినిధి రవీష్ కుమార్ వ్యాఖ్యానించారు. ఈ ఏడాది పాక్ సైన్యం జరిపిన కాల్పుల్లో కనీసం 21 మంది జవాన్లు అమరులయ్యారని తెలిపారు.

అంతర్జాతీయ సరిహద్దు, వాస్తవాధీన రేఖ వెంబడి శాంతిని నెలకొల్పడంలో భాగంగా 2003లో చేసుకున్న కాల్పుల విరమణ ఒప్పందాన్ని తరచూ పాక్‌కు గుర్తుచేస్తున్నామని ఆయన పేర్కొన్నారు. అయినా సరే పాకిస్థాన్ మాత్రం తన వైఖరి మార్చుకోలేదని రవీశ్ కుమార్ దుయ్యబట్టారు. దేశంలోకి ఉగ్రవాదుల చొరబాట్లు సహా పాక్ సైన్యం దుశ్చర్యలను భద్రతా బలగాలు సమర్ధంగా తిప్పికొడుతున్నాయని ఆయన వివరించారు.

వాస్తవాధీన రేఖ (ఎల్ఓసీ) వెంట ఉన్న హాజీపూర్, కెరాన్ సెక్టార్‌లో భారత ఆర్మీ పోస్టులపై ఈనెల 10,11 తేదీల్లో పాక్ బలగాలు భారీఎత్తున కాల్పులకు తెగబడిన విషయం తెలిసిందే. దీనికి దీటుగా స్పందించిన భారత్, పాక్ ఆగడాలను తిప్పికొట్టింది. ఈ ఎదురు కాల్పుల్లో ముగ్గురు పాక్ రేంజర్లు హతమవ్వగా, సైనిక నిబంధనల ప్రకారం పాకిస్థాన్ సైనికులు కొందరు తెల్లజెండాలతో వచ్చి తమ జవాన్ల మృతదేహాలను తీసుకెళ్లారు. ఈ ఘటనకు సంబంధించి ఇండియన్ ఆర్మీ విడుదల చేసిన వీడియో ప్రస్తుతం సోషల్ మీడియాలో వైరల్‌గా మారిన విషయం తెలిసిందే.