దేశంలో కొత్తగా 3,823 కరోనా కేసులు.. ఢిల్లీలో 14 శాతం దాటిన పాజిటివిటీ రేటు

దేశంలో కరోనా మహమ్మారి మరోసారి విజృంభిస్తోంది. రెండు వారాలుగా రోజువారీ కరోనా కేసులు పెద్ద సంఖ్యలో నమోదవుతున్నాయి. గడచిన 24 గంటల్లో దేశవ్యాప్తంగా 3,823 మంది కొత్తగా వైరస్ బారినపడ్డారు. ముందు రోజు (2,997 కేసులు)తో పోల్చితే ఇవి 27 శాతం అధికం. శనివారం ఉదయం నుంచి ఆదివారం ఉదయం వరకూ 1,33,153 నమూనాలను పరీక్షించగా.. 3,823 మందికి వైరస్ నిర్దారణ అయినట్టు కేంద్ర ఆరోగ్య శాఖ వెల్లడించింది. అలాగే, మరో 1,784 మంది మహమ్మారి నుంచి కోలుకోగా... ఇప్పటి వరకూ కరోనా నుంచి కోలుకున్నవారి సంఖ్య 4,41,73,335గా ఉంది. రికవరీల రేటు 98.72 శాతం కాగా.. దేశంలో ప్రస్తుతం యాక్టివ్ కేసుల సంఖ్య 18,369కి చేరింది.అలాగే, రోజువారీ పాజిటివిటీ రేటు దాదాపు 3 శాతానికి చేరువకాగా.. వీక్లీ పాజిటివిటీ రేటు 2.24 శాతంగా ఉంది. దేశ రాజధాని ఢిల్లీలో ఏడు నెలల తర్వాత అత్యధిక కేసులు నమోదయ్యాయి. మొత్తం 416 మంది కొత్తగా వైరస్ బారినపడ్డారు. ముందు రోజు 195 కేసులతో పోల్చితే ఇది 40 శాతం అధికం. గత 24 గంటల్లో 2,985 మంది నమూనాలను పరీక్షించగా.. 416 మందికి కరోనా నిర్ధారణ అయ్యింది. అంటే ఢిల్లీలో పాజిటివిటీ రేటు 14.37 శాతంగా నమోదయ్యింది. కరోనాతో ఒకరు చనిపోయారు. మహారాష్ట్రలోనూ మరో 669 కొత్త కేసులు వెలుగుచూశాయి. ఇందులో ఒక్క ముంబయి నగరం నుంచే 347 కేసులు ఉండటం గమనార్హం.

మరోవైపు, భారత్‌లో కేసుల పెరుగుదలకు ఒమిక్రాన్ (Omicron) సబ్- వేరియయంట్ XBB.1.16 కారణమని ప్రపంచ ఆరోగ్య సంస్థ (WHO) తెలిపింది. ఈ వేరియంట్ BA.2.10.1 & BA.2.75 పునఃసంయోగం, దాని మాతృక XBBతో పోలిస్తే SARS-CoV-2 స్పైక్ ప్రోటీన్ (E180V, F486P & K478R)లో మూడు అదనపు ఉత్పరివర్తనలు ఉన్నాయని డబ్ల్యూహెచ్‌వో పేర్కొంది.


Read More Latest National News And Telugu News