పెరుగుతున్న కేసులు.. బూస్టర్ డోసుపై కేంద్రం కీలక నిర్ణయం

దేశంలో కరోనా కేసులు క్రమంగా పెరుగుతున్న వేళ.. కొవిడ్ వ్యాక్సిన్ విషయంలో కేంద్ర ప్రభుత్వం కీలక నిర్ణయం తీసుకుంది. బూస్టర్‌ డోసు (Booster Dose) వ్యవధిని ప్రస్తుతం ఉన్న 9 నెలల నుంచి 6 నెలలకు తగ్గించింది. నేషనల్‌ టెక్నికల్‌ అడ్వైజరీ గ్రూప్‌ ఆన్‌ ఇమ్యూనైజేషన్‌ (NTAGI) సిఫార్సుల మేరకు కేంద్రం ఈ నిర్ణయం తీసుకుంది. ఇకపై రెండో డోసు తీసుకొని 6 నెలలు పూర్తైన వారికి బూస్టర్‌ డోసును అందించనున్నట్లు వైద్య శాఖ అధికారులు బుధవారం (జులై 6) వెల్లడించారు.

వ్యాక్సినేషన్ ప్రక్రియలో భాగంగా కేంద్ర ప్రభుత్వం ఇప్పటికే దేశవ్యాప్తంగా ప్రికాషనరీ డోసు పంపిణీకి అనుమతి ఇచ్చింది. ప్రస్తుతం ప్రికాషనరీ డోసును ప్రైవేట్ కేంద్రాల్లోనే అందిస్తున్నారు. రెండో డోసు తీసుకున్న 9 నెలల గడువు పూర్తయిన వారికే పంపిణీ చేస్తుండగా.. ఇక నుంచి 6 నెలల గడువు పూర్తైన వారికి పంపిణీ చేస్తారు.

మరోవైపు బుధవారం (జులై 6) దేశంలో కొత్తగా 16,159 కొవిడ్ కేసులు నమోదయ్యాయి. కొవిడ్ కారణంగా మరో 28 మంది మరణించారు. తమిళనాడు, పశ్చిమ బెంగాల్‌లో వైరస్ వ్యాప్తి ఎక్కువగా ఉంది. మహారాష్ట్ర, కేరళ, తెలంగాణ తదితర రాష్ట్రాల్లో కేసులు ఎక్కువగా నమోదవుతున్నాయి. ప్రస్తుతం దేశంలో 1,15,212 యాక్టివ్ కేసులు ఉన్నాయి. దేశంలో ఇప్పటివరకూ 4.35 కోట్ల మందికి పైగా కరోనా వైరస్ బారినపడగా.. 5.25 లక్షల మరణాలు సంభవించాయి.