దక్షిణాసియాపై ట్రంప్ వైఖరిని స్వాగతించిన భారత్

అఫ్ఘనిస్తాన్ ఎదుర్కొంటున్న సవాళ్లను అధిగమించడానికి, సరిహద్దుల్లో తీవ్రవాదులు ప్రయత్నాలను ఎదుర్కొనేందుకు అమెరికా అధ్యక్షుడు డోనాల్డ్ ట్రంప్ సంకల్పాన్ని భారత్ స్వాగతించింది. ఈ పోరాటంలో అమెరికాకు భారత్ సహకరిస్తుందని విదేశాంగ శాఖ అధికార ప్రతినిధి రవీశ్ కుమార్ తెలిపారు. అంతేకాదు అప్ఘన్‌ శాంతి, సుస్థిర స్థాపన, భద్రతకు ఆ ప్రభుత్వానికి మద్దతు విషయంలో భారత్ కట్టుబడి ఉందని వెల్లడించారు. అలాగే అప్ఘన్ పునర్నిర్మాణం, అభివృద్ధికి సహకరించి, ఆ దేశ ప్రజలతో మా సంప్రదాయిక స్నేహాన్ని విస్తరించే అంశంలో స్థిరమైన విధానంతో ఉన్నామని కుమార్ తెలియజేశారు. ఇతర దేశాల భాగస్వామ్యంతో దీన్ని భవిష్యత్తులోనూ కొనసాగిస్తామని ఆయన తెలిపారు.

అప్ఘన్‌‌లో శాంతిస్థాపనకు చేస్తున్న సుదీర్ఘ యుద్ధాన్ని ముగించడానికి ట్రంప్ నిరాకరించడమే కాదు, పాకిస్థాన్ ఉగ్రవాదులకు స్వర్గం మారిందని, పాక్ తన వైఖరి మార్చుకోకపోతే పరిణామాలు తీవ్రంగా ఉంటాయని హెచ్చరించారు. అలాగే ఈ పోరాటంలో భారత్ సహాయం అవసరమని ట్రంప్ కోరారు. దీనిపై భారత్ తన ప్రతిస్పందన తెలియజేసింది. అమెరికా సర్వసైన్యాధ్యక్ష హోదాలో ట్రంప్ తొలిసారిగా ప్రైమ్-టైమ్ టెలివిజన్ ద్వారా ప్రసంగించి, దక్షిణాసియా విధానాన్ని ప్రకటించారు. ఇందులో కీలక భాగమైన ఇండియాతో వ్యూహాత్మక భాగస్వామ్యం మరింత అభివృద్ధి చెందాల్సిన అవసరముందని అన్నారు.