తీరు మారకపోతే ఊరుకోం.. పాక్‌కు ట్రంప్ వార్నింగ్!

అమెరికా అధ్యక్షుడు డొనాల్డ్ ట్రంప్.. పాకిస్థాన్‌కు మరోసారి గట్టి హెచ్చరికలు పంపారు. పాక్‌ తన తీరు మార్చుకోకపోతే ఊరుకునేది లేదని మండిపడ్డారు. ఇదే సమయంలో భారత్‌తో సంబంధాలను మరింత బలపరుచుకోవాలని ఆశిస్తున్నట్లు ఆయన చెప్పారు. ఉగ్రవాద సంస్థల విషయంలో పాక్‌ ప్రదర్శిస్తున్న తీరు పట్ల ట్రంప్ తీవ్ర అసహనం వ్యక్తం చేశారు. ఉగ్రవాద సంస్థలకు పాక్‌ స్వర్గధామంగా మారిందని.. దాన్ని అడ్డుకునే చర్యలు తీసుకోవాలని ఆ దేశానికి సూచించారు. సీమాంతర ఉగ్రవాదం గురించి ప్రత్యేకంగా ప్రస్తావించారు.

మీడియా ద్వారా అమెరికా ప్రజలనుద్దేశించి మాట్లాడుతూ.. ‘అఫ్గానిస్థాన్‌ సహా దక్షిణాసియా దేశాలపై అమెరికా తన వ్యూహాలను మార్చుకోవాలని నిర్ణయించుకుంది. పాకిస్థాన్‌లో ఉగ్రవాదులు స్వేచ్ఛగా తిరుగుతున్నారు. తాలీబన్‌ లాంటి ఉగ్రవాద సంస్థలు ఆసియా దేశాలకు ముప్పుగా మారుతున్నాయి. ఇక దీనిపై మౌనంగా ఉండేది లేదు. పాక్‌ చర్యలు తీసుకోకపోతే ఆ దేశం చాలా నష్టపోవాల్సి వస్తుంది’ అని ట్రంప్ హెచ్చరించారు.

భారత్‌-అమెరికా సంబంధాలను ప్రస్తావిస్తూ.. ‘ప్రపంచంలోనే అతిపెద్ద ప్రజాస్వామ్య దేశమైన భారత్‌.. మాకు కీలకమైన భద్రత, ఆర్థిక భాగస్వామి’ అని ట్రంప్ పేర్కొన్నారు. పొరుగు దేశమైన అఫ్గాన్‌లో శాంతి, స్థిరత్వం కోసం భారత్‌ మరింత చొరవ చూపాలని ఆయన కోరారు. ఈ సందర్భంగా.. ఆఫ్గాన్‌కు భారత్‌ అందిస్తున్న సహకారం పట్ల ఆయన సంతోషం వ్యక్తం చేశారు. అమెరికాతో బిలియన్‌ డాలర్ల వ్యాపారం చేస్తున్న భారత్‌.. అఫ్గాన్‌కు ఆర్థికంగా మరింత సాయం అందించాలని కోరుకుంటున్నట్లు ట్రంప్‌ తెలిపారు.

మరోవైపు అమెరికా అధ్యక్షుడు చేసిన సూచనలను భారత్ పరిశీలిస్తుందని విదేశాంగ శాఖ ప్రతినిది రవీశ్ కుమార్ తెలిపారు. అఫ్గానిస్థాన్‌లో శాంతి, సుస్థిరత, భద్రత కోసం భారత్ చిత్తశుద్ధితో పని చేస్తోందని ఆయన వివరించారు.

India today welcomed US President Donald Trump's determination to enhance efforts to overcome the challenges facing Afghanistan and confront issues of safe havens and other forms of cross-border support enjoyed by terrorists.