పాక్ కాల్పులకు దీటుగా బదులిచ్చిన భారత్.. జవాన్ మృతి, 8 మందికి గాయాలు

నియంత్రణ రేఖ వెంట కవ్వింపు చర్యలకు పాల్పడుతున్న పాక్ సైన్యానికి భారత భద్రతా దళాలు షాక్ ఇచ్చాయి. పాక్ జవాన్లు జరిపిన కాల్పులకు ప్రతిగా భారత సైనికులు చేసిన కాల్పుల్లో.. దాయాది దేశానికి చెందిన ఓ జవాన్ మరణించగా.. మరో 8 మంది తీవ్రంగా గాయపడ్డారు. కశ్మీర్‌లోని పూంచ్ సెక్టార్‌లో సోమవారం (జులై 27) ఈ ఘటన చోటు చేసుకుంది.

హజీపూర్, పూంచ్, ఛాంబ్, రాక్ చిక్రీ సెక్టార్లలో పాక్ ఆర్మీ కాల్పులకు పాల్పడిందని ఇండియన్ ఆర్మీ వర్గాలు వెల్లడించాయి. భారత భద్రతా బలగాలు ఈ దాడులను దీటుగా తిప్పి కొట్టాయని తెలిపాయి. ఫలితంగా పాక్ వైపు నష్టం వాటిల్లిందని వెల్లడించాయి.

పాకిస్థాన్ సైన్యం పదే పదే కాల్పుల విరమణ ఒప్పందాన్ని ఉల్లంఘిస్తూ సరిహద్దు వెంట పలు ప్రాంతాల్లో కాల్పులకు తెగబడుతోంది. ఈ కాల్పుల్లో భారత జవాన్లతో పాటు సరిహద్దు గ్రామాలకు చెందిన పౌరులు గాయపడుతున్నారు. కొంత మంది ప్రాణాలు కూడా కోల్పోతున్నారు. సరిహద్దు గ్రామాల ప్రజల ఇళ్లు ధ్వంసమవుతున్నాయి.

Also Read: మిరాకిల్ ఎస్కేప్.. యాక్సిడెంట్ అతడి ప్రాణాలను కాపాడింది, వీడియో వైరల్

Don't Miss: అన్‌లాక్ 3.0: సినీ ప్రియులకు గుడ్ న్యూస్?