గాన చంద్రుడు.. దేశం ఓ గొప్ప స్వరాన్ని కోల్పోయింది: రాష్ట్రపతి

గాన గంధర్వుడు ఎస్పీ బాలు మరణంపై రాష్ట్రపతి రామ్‌నాథ్ కోవింద్ దిగ్భ్రాంతి వ్యక్తం చేశారు. భారతీయ సంగీతం ఓ అద్భుతమైన స్వరాన్ని కోల్పోయిందన్నారు. సంగీత ప్రియులకు ఎస్‌పీ బాలసుబ్రహ్మణ్యం మరణం తీరని లోటని వ్యాఖ్యానించారు. అభిమానులు ఆయణ్ని ‘పాటలు పాడే చంద్రుడి’గా పిలుచుకుంటారని పేర్కొన్నారు.

పద్మ భూషణ్‌తో పాటు ఎన్నో జాతీయ అవార్డులను బాలసుబ్రహ్మణ్యం సొంతం చేసుకున్నారని రాష్ట్రపతి రామ్‌నాథ్ కోవింద్ గుర్తు చేశారు. బాలు కుటుంబ సభ్యులకు, మిత్రులకు ప్రగాఢ సానుభూతి తెలియజేస్తున్నట్లు రాష్ట్రపతి ట్వీట్ చేశారు.


సంగీత ప్రపంచానికి బాలు మరణం పూడ్చలేని లోటని ప్రధాని పేర్కొన్నారు. బాలు స్వరం దశాబ్దాలుగా దేశంలో ఇంటింటా అలరించిందని గుర్తు చేశారు. సంగీత ప్రపంచానికి బాలు చేసిన సేవలను గుర్తుచేస్తూ భావోద్వేగ ట్వీట్ చేశారు.

దేశ ప్రజలను అలరించిన శ్రీపతి పండితారాధ్యుల బాలసుబ్రహ్మణ్యం శుక్రవారం (సెప్టెంబర్ 25) మధ్యాహ్నం కన్నుమూశారు. 50 రోజులుగా చెన్నైలోని హాస్పిటల్‌లో పోరాడుతూ కరోనాను జయించిన ఆయన ఇతర ఆరోగ్య సమస్యలు చుట్టుముట్టడంతో.. శుక్రవారం మధ్యాహ్నం 1.04 గంటలకు తుది శ్వాస విడిచారు. బాలు ఇక లేరనే వార్తతో దేశం దిగ్భ్రాంతికి గురవుతోంది. పలువురు ప్రముఖులు సంతాపం తెలియజేస్తున్నారు.

సుమారు 16 భాషల్లో 40వేలకు పైగా పాటలు పాడి ప్రపంచంలోనే అత్యధిక పాటలు పాడిన మేల్ సింగర్‌గా గిన్నిస్ బుక్ ఆఫ్ రికార్డ్స్‌లో బాలు స్థానం సంపాదించారు. కేవలం గాయకుడిగానే కాకుండా సంగీత దర్శకుడిగా, నటుడిగా, డబ్బింగ్ ఆర్టిస్ట్‌గా దక్షిణాది సినీ పరిశ్రమలో చెరగని ముద్ర వేశారు. కమల్‌ హాసన్‌, రజినీకాంత్‌, సల్మాన్‌ ఖాన్‌, అనిల్ కపూర్‌ లాంటి ప్రముఖ నటులకు బాలు గాత్రదానం చేశారు. కమల్ హాసన్‌కు అయితే తెలుగులో బాలు తప్ప మరొకరు డబ్బింగ్ చెప్పలేదు. ‘దశావతారం’ సినిమాలో తొమ్మిది పాత్రలకు బాలునే డబ్బింగ్ చెప్పడం విశేషం.

Also Read: పిల్లల కోసం అవయవాలు అమ్మకానికి పెట్టిన అమ్మ.. ‘గుండె’ను మెలిపెట్టే కష్టం