Farmers Protest: పొలాల వెంట విమాన సిబ్బంది.. వేరే దారిలేదు 2020లో, వైరల్ వీడియో

రైతుల ఆందోళనతో దేశం అట్టుడుకుతోంది. ఢిల్లీకి దారి తీసే దారులన్నీ స్తంభించిపోయాయి. పంజాబ్, హర్యానాలో ప్రధాన రహదారులన్నింటిలో అన్నదాతలు బైఠాయించారు. రోజుల తరబడి ఆందోళన కొనసాగుతుండటంతో జనం ఇబ్బందులు పడుతున్నారు. అయినా.. అన్నదాతల కోసం ఆ ఇక్కట్లను కొంత మంది ఇష్టంగా భరిస్తున్నారు. చంఢీగడ్‌లో ఇండిగో విమానయాన సంస్థ సిబ్బంది కూడా ఇంచుమించు ఇదే చేశారు.

రోడ్లన్నీ స్తంభించిపోవడంతో చంఢీగడ్ ఎయిర్‌పోర్ట్‌కు వెళ్లే మార్గం లేకపోవడంతో ఇండిగో ఉద్యోగులు ప్రత్యామ్నాయ మార్గం ఎంచుకున్నారు. పంట పొలాల మధ్యలో నుంచి నడక సాగించి విమానాశ్రయం చేరుకున్నారు. క్రూ సిబ్బందిలో కొంత మంది ఉద్యోగులు ఇందుకు సంబంధించిన దృశ్యాలను తమ సెల్‌ఫోన్లలో బంధించారు. ఈ వీడియో ఇప్పుడు సోషల్ మీడియాలో వైరల్ అవుతోంది.


పొలాల మధ్యలో నుంచి ప్రయాణిస్తూ ఇండిగో సిబ్బంది ఆసక్తికర వ్యాఖ్యలు చేశారు. 2020ని ముగించడానికి ఇంతకంటే ఉత్తమమైన మార్గం లేదన్నారు. ‘కంట్రీ రోడ్స్..’ అంటూ వారు నడుస్తున్న మార్గాన్ని చూపెట్టారు. ఆ దృశ్యాలను మీరూ చూడండి..

కేంద్రానికి 19 వరకు టైమ్ ఇస్తున్నాం: రైతుల హెచ్చరిక
మరోవైపు.. కేంద్రంతో జరుపుతున్న చర్చలు కొలిక్కి రాకపోవడంతో రైతులు తమ ఆందోళన తీవ్రం చేశారు. సోమవారం (డిసెంబర్ 14) సింఘు వద్ద నిరాహార దీక్ష చేపట్టనున్నట్లు రైతు సంఘాల నేతలు తెలిపారు. కేంద్ర ప్రభుత్వానికి డిసెంబర్ 19 వరకు సమయం ఇస్తున్నట్లు స్పష్టం చేశారు. తమ డిమాండ్లు పరిష్కరించకుంటే డిసెంబర్ 19 నుంచి ఆమరణ నిరాహార దీక్ష చేపడతామని హెచ్చరించారు.

రైతులు ఇచ్చిన పిలుపు అందుకొని ఆదివారం టోల్ ప్లాజాల దిగ్బంధానికి పెద్ద ఎత్తున తరలి రావడానికి సిద్ధమయ్యారు. రాజస్థాన్ నుంచి వేలాది ట్రాక్టర్లలో రైతులు ఢిల్లీ సరిహద్దుకు ర్యాలీగా చేరుకోనున్నారు. ఢిల్లీ-జయపుర రహదారిని దిగ్బంధం చేస్తామని రైతులు హెచ్చరించారు. నూతన వ్యవసాయ చట్టాలను రద్దు చేయాల్సిందేనని.. సవరణలకు ఎంతమాత్రం అంగీకరించేది లేదని మరోసారి తేల్చి చెప్పారు.

Also Read: విమాన సిబ్బంది డైపర్లు ధరించండి.. చైనా షాకింగ్ ఉత్తర్వులు

Must Read: భారత్‌ను చూసి నేర్చుకోవాలి: బిల్ గేట్స్‌

Don't Miss: ఇక 50 రూపాయలకే పెట్రోల్.. పేలుతున్న సెటైర్లు, పొట్ట చెక్కలే!