Indigo flight: చుక్కలు చూపించిన చాటింగ్... ఆగిపోయిన ఫ్లైట్

Indigo flight: ఓ ప్రయాణికుడి మొబైల్ ఫోన్‌కు వచ్చిన మెసెజ్‌ కారణంగా విమానం ఆలస్యంగా బయలుదేరింది. ఆదివారం సాయంత్రం ఇండిగో విమానం మంగళూరు నుంచి ముంబైకి వెళ్లాల్సి ఉంది. అయితే ఫ్లైట్ బయలుదేరే ముందు పోలీసులు ప్రయాణికులందరిని ఫ్లైట్ నుంచి దిగమని తనిఖీలు చేశారు. దీంతో ఫ్లైట్‌ ఆరు గంటలు లేట్‌గా స్టార్ట్ అవ్వాల్సి వచ్చింది. ఇంత హడావిడికి విమానంలో ఉన్న ఓ ప్రయాణికురాలే కారణం.

తనతోపాటు విమానంలో ప్రయాణిస్తున్న ఓ వ్యక్తి మొబైల్ ఫోన్‌కి వచ్చిన అనుమానాస్పద మెసెజ్‌ను చూసి ఆ మహిళా ప్రయాణికురాలు కంగారు పడింది. వెంటనే సిబ్బందిని అప్రమత్తం చేసింది. సిబ్బంది ఎయిర్ ట్రాఫిక్ కంట్రోలర్‌ను విషయం తెలియజేయడంతో టేకాఫ్‌కు సిద్ధమైన విమానాన్ని నిలిపేశారు. ఆ ఫ్లైట్ తిరిగి ఎయిర్‌పోర్టు బేకు చేరుకుంది.

ఇంతకీ ఆ వ్యక్తి తన మొబైల్లో ప్రియురాలితో చాట్ చేస్తున్నాడు. ఆమె కూడా అదే ఎయిర్‌పోర్టు నుంచి బెంగళూరుకు విమానం ఎక్కేందుకు వచ్చింది. ఆ క్రమంలో వారిద్దరూ ఛాటింగ్‌లో మాట్లాడుకుంటున్నారు. కానీ మహిళా ప్రయాణికురాలకు అనుమానం రావడంతో దానినే సిబ్బందికి తెలియజేసింది. దాంతో పోలీసులు అతడిని అదుపులోకి తీసుకుని చాలాసేపు విచారించారు. చాలాసేపు విచారించిన తర్వాతగానీ ప్రయాణించేందుకు అనుమతి ఇవ్వలేదు.

అలాగే ప్రయాణికులని కూడా తనిఖీలు చేశారు. సోదాలు చేసిన తర్వాతే 185 మంది ప్రయాణికులను ముంబై వెళ్లే విమానంలోకి తిరిగి అనుమతించారు. దీంతో విమానం సాయంత్రం ఐదు గంటలకు బయలుదేరింది. అయితే ఇద్దరి స్నేహితుల మధ్య స్నేహ పూర్వక సంభాషణ జరిగినందున అర్ధరాత్రి వరకు ఎటువంటి ఫిర్యాదు నమోదు చేయలేదని నగర పోలీసు కమిషనర్ ఎన్.శశికుమార్ తెలిపారు.