ప్రయాణికుడికి గుండెపోటు.. కరాచీలో దిగిన ఇండిగో విమానం

షార్జా నుంచి లక్నో రావాల్సిన ఇండిగో విమానం ఒకటి పాకిస్థాన్‌లోని కరాచీ ఎయిర్ పోర్టులో ఎమర్జెన్సీ ల్యాండ్ అయింది. విమానంలో ఉన్న ఓ ప్రయాణికుడికి అకస్మా్త్తుగా గుండె పోటు రావడంతో ఇండిగో పైలట్లు.. పాక్ అధికారుల అనుమతి తీసుకొని అత్యవసరంగా కరాచీ విమానాశ్రయం వైపు మళ్లించారు. కానీ, ప్రయాణికుడి ప్రాణాలు మాత్రం దక్కలేదు. మంగళవారం (మార్చి 2) ఉదయం ఈ ఘటన చోటు చేసుకుంది.

షార్జా నుంచి లక్నో బయలుదేరిన ఇండిగో 6E 1412 విమానాన్ని మెడికల్‌ ఎమర్జెన్సీ తలెత్తడంతో కరాచీకి మళ్లించినట్లు ఇండిగో సంస్థ ఓ ప్రకటనలో తెలిపింది. ‘ప్రయాణికుడు తీవ్ర అస్వస్థతకు గురవడంతో షార్జా-లక్నో ఇండిగో విమానం పాకిస్థాన్‌లోని కరాచీలో మంగళవారం అత్యవసరంగా ల్యాండ్‌ అయింది. కరాచీకి చేరుకున్న వెంటనే ప్రయాణికుడు మరణించారని విమానాశ్రయ వైద్య బృందం నిర్ధారించింది’ అని ఇండిగో తన ప్రకటనలో పేర్కొంది.

‘ఈ ఘటన మాకు చాలా బాధ కలిగించింది. మా ప్రార్థనలు మృతుడి కుటుంబంతోనే ఉన్నాయి’ అని ఇండిగో పేర్కొంది. ఇటీవల ఇండియన్‌ ఎయిర్‌ అంబులెన్స్‌ కూడా ఇస్లామాబాద్‌ విమానాశ్రయంలో అత్యవసరంగా ల్యాండ్‌ అయిన విషయం తెలిసిందే. ఇంధనం నింపుకునేందుకు ఆ విమానాన్ని ఎమర్జెన్సీ ల్యాండింగ్ చేశారు.

Also Read:

✦ కారు టైరు మార్చిన కలెక్టర్‌.. రోహిణి సింధూరి, డైనమిక్ IAS

✦ రేపో మాపో పోయేటోణ్ని.. నాకెందుకు వ్యాక్సిన్, యువతకు ఇవ్వండి