IndiGo విమానానికి బాంబు హెచ్చరిక.. మహిళ అరెస్ట్!

ఓ మహిళ తెలిపిన సమాచారం ముంబయి విమానాశ్రయం అధికారులను పరుగులు పెట్టించింది. విమానాశ్రయ వర్గాల సమాచారం ప్రకారం.. శనివారం ఉదయం 6.05 గంటలకు ముంబయి విమానాశ్రయం నుంచి ఢిల్లీ మీదుగా లక్నో వెళ్లాల్సిన ఇండిగో విమానంలో బాంబు ఉన్నట్లు సమాచారం అందటంతో అధికారులు అప్రమత్తమయ్యారు.

ఏం జరిగింది?: గో ఎయిర్‌ విమానంలో ఢిల్లీ వెళ్లేందుకు ఎయిర్‌పోర్టుకు వచ్చిన ఓ మహిళ ప్రయాణికురాలు టర్మినల్ 1లోని ఇండిగో చెక్‌ఇన్ కౌంటర్ వద్దకు వెళ్లి ముంబయి నుంచి లక్నోకు వెళ్లే ఇండిగో 6ఈ 3612 విమానంలో బాంబు ఉందని తెలిపింది. అంతేగాక అనుమానితుల ఫొటోలను కూడా చూపించింది.

దీంతో అప్రమత్తమైన ఇండిగో సిబ్బంది విమానాశ్రయంలోని భద్రతా సిబ్బందికి సమాచారం అందించారు. భద్రతా అధికారులు విమానం నుంచి ప్రయాణికులను కిందికి దించేశారు. అనంతరం విమానాన్ని నిర్మానుష్య ప్రాంతానికి తీసుకెళ్లి సోదాలు చేశారు. తనిఖీల్లో ఎలాంటి పేలుడు పదార్థాలు లభించకపోవడంతో ఊపిరి పీల్చుకున్నారు. ఈ ఘటనపై స్పందించిన ఇండిగో.. బాంబు ఉన్నట్లు సమాచారం ఇచ్చిన మహిళ మానసికస్థితి బాగోలేదని తెలిపింది. ఈ తనిఖీల వల్ల విమానం గంట ఆలస్యం వల్ల బయల్దేరింది. సీఐఎస్ఎఫ్ అధికారులు మహిళా ప్రయాణికురాలిని అదుపులోకి తీసుకొని విచారిస్తున్నారు.