సర్జికల్ స్ట్రైక్స్‌పై కేజ్రీవాల్ వ్యాఖ్యలతో దుమారం

ఢిల్లీ సీఎం అరవింద్ కేజ్రీవాల్ పై మరోమారు సిరా దాడి జరిగింది. ఈసారి రాజస్థాన్లోని బికనీర్ వేదికగా కొందరు వ్యక్తులు ఆయనపై ఇంక్ చల్లారు. కానీ, సిరా చల్లిన వారి ఆగ్రహానికి కారణమేమిటనేది ఇంకా తెలియలేదు. కాగా, ఈ ఘటనపై కేజ్రీవాల్ ట్విట్టరులో స్పందించారు. తనపై సిరా చల్లిన వారిని దేవుడు చల్లగా చూడాలని తాను కోరుకుంటున్నట్లు ట్వీట్ చేశారు.

ఇటీవల మన ఆర్మీ పాక్ ఆక్రమిత కాశ్మీర్ భూభాగంలో జరిపిన సర్జికల్ స్ట్రైక్స్ కు సంబంధించి ప్రధాని మోడీని ఉద్దేశిస్తూ సోమవారం నాడు వీడియో సందేశంలో చేసిన వ్యాఖ్యలు దుమారం రేపాయి. అసలు సర్జికల్ స్ట్రైక్సే జరగలేదని అర్థం వచ్చేలా ఆయన ఆ వీడియోలో మాట్లాడారని అంటున్నారు. అది సోషల్ మీడియాలో పెద్ద దుమారమే రేపింది. కేజ్రీవాల్ కు భారత సైన్యం శక్తిసామర్ధ్యాల మీద నమ్మకం లేదని అందుకే ఈ తరహా ప్రేలాపనలు చేస్తున్నారని కేంద్రమంత్రులు ఆగ్రహం వ్యక్తం చేశారు. కాగా, తాను అలాంటి ఉద్దేశంతో ఆ వ్యాఖ్యలు చేయలేదని, సర్జికల్ స్ట్రైక్స్ జరగలేదని పాక్ చేస్తున్న ప్రచారాన్ని ఎత్తిచూపానని, ఆ దేశానికి బుద్ధివచ్చేలా చేసి దాని నోరుమూయించాలని మాత్రమే కోరానని కేజ్రీవాల్ మంగళవారం వివరణ ఇచ్చారు. ఈ వ్యాఖ్యలు నచ్చని వ్యక్తులే ఆయనపై ఇంక్ చల్లి ఉంటారని భావిస్తున్నారు.