కొత్త సంవత్సర వేడుకలు జరుపుకోని దేశాలివే.. అగ్రరాజ్యాల్లో మన తర్వాతే!

2020 కాల గర్భంలో కలిసిపోతోంది. ఓ ఏడాదే కాదు, ఓ దశాబ్దం ముగిసిపోయింది. కోటి ఆశలతో కొత్త సంవత్సరంలో, కొత్త దశాబ్దంలో అడుగు పెట్టాం. 2020 సంవత్సరం మిగిల్చిన విషాద అనుభవాలతో చాలా మంది నూతన సంవత్సర వేడుకలను నిర్వహించుకోవడానికి సిద్ధమయ్యారు. అయితే.. కరోనా వైరస్ కారణంగా, మరీ ముఖ్యంగా కొత్త వైరస్ కలకలం నేపథ్యంలో ఈసారి వేడుకల్లో సందడి కనిపించడంలేదు.

ఏదేమైనా.. ఎవరికి వారు మాత్రం తమ కుటుంబసభ్యులతో, మిత్రులతో ఘనంగా కొత్త సంవత్సరానికి ఆహ్వానం పలకడానికి సిద్ధమయ్యారు. కొత్త సంవత్సరంలో అడుగు పెట్టిన సందర్భంగా కొన్ని ఆసక్తికర వివరాలు..

✦ జనవరి 1న కొత్త సంవత్సర వేడుకలనే నిర్వహించుకోని దేశాలు కొన్ని ఉన్నాయి. వీటిలో చైనా ప్రధానమైంది. చైనాతో పాటు సౌదీ అరేబియా, ఇజ్రాయెల్, వియత్నాం దేశాలు న్యూ ఇయర్ వేడుకలను జరుపుకోరు. వారి క్యాలెండర్ ప్రకారమే అక్కడ కొత్త సంవత్సరం వేడుకలు నిర్వహించుకుంటారు. చైనా ప్రజలు ఫిబ్రవరి నెలలో వారి కొత్త సంవత్సరాన్ని ఘనంగా జరుపుకొంటారు.

✦ రష్యాలో కొత్త సంవత్సరం వేడుకలను రెండుసార్లు జరుపుకొంటారు. ఇంగ్లిష్ క్యాలెండర్ ప్రకారం జనవరి 1న, జూలియన్ క్యాలెండర్ ప్రకారం జనవరి 14న వేడుకలకు జరుపుకొంటారు.

✦ ప్రపంచంలో అందరికంటే ముందు పసిఫిక్ సముద్రంలోని సమోవా ద్వీపంలో కొత్త సంవత్సరం వస్తుంది. భారత కాలమానం ప్రకారం మధ్యాహ్నం 3.30 గంటలకే ఆ ప్రాంతం న్యూ ఇయర్‌లోకి అడుగుపెట్టింది.

✦ ఆస్ట్రేలియా, న్యూజిలాండ్ దేశాల్లో కొత్త సంవత్సర వేడుకలు అందరికంటే ముందుగానే మొదలవుతాయి. అక్కడ మనకంటే ఐదున్నర గంటల ముందే కొత్త సంవత్సరం మొదలవుతుంది. సిడ్నీ హార్బర్‌లో న్యూ ఇయర్ వేడుకలు ఘనంగా జరుగుతాయి. ఈ వేడుకలను ప్రపంచవ్యాప్తంగా వీక్షిస్తారు.

✦ జపాన్‌తో పాటు దక్షిణ కొరియా, ఉత్తర కొరియా మనకంటే మూడున్నర గంటల ముందే కొత్త సంవత్సరంలోకి అడుగుపెడతాయి.

✦ మన పొరుగు దేశాలైన భూటాన్, నేపాల్, బంగ్లాదేశ్.. భారత్ కంటే అరగంట ముందు కొత్త సంవత్సరంలోకి అడుగుపెడతాయి. శ్రీలంక మనతో పాటే న్యూ ఇయర్ వేడుకలు జరుపుకొంటుంది.

✦ భారత్ తర్వాత ఐదున్నర గంటలకు యూకేలో కొత్త సంవత్సరం మొదలవుతుంది.

✦ మనకు జనవరి 1 ఉదయం 10.30 గంటల సమయం అయినప్పుడు అమెరికాలోని న్యూయార్క్‌లో న్యూ ఇయర్ వేడుకలు ప్రారంభమవుతాయి. అమెరికాలోని బేకర్, హోవార్డ్ దీవులను కొత్త సంవత్సరం చివరగా వచ్చే భూభాగాలుగా పేర్కొంటారు.

Also Read: బాబోయ్ చలి, గడ్డకట్టిన సరస్సు.. ఎలా ఎంజాయ్ చేస్తున్నారో చూడండి