ఈషా పెళ్లి వేడుకలు: ఉదయ్‌పూర్ వాసులకు స్వయంగా వడ్డించిన అంబానీ ఫ్యామిలీ

భారత వ్యాపార దిగ్గజం, రిలయన్స్ ఇండస్ట్రీస్ అధినేత ముఖేశ్ అంబానీ తనయ ఈషా అంబానీ వివాహ వేడుకలు అంగరంగ వైభవంగా జరుగుతున్నాయి. ఇషా అంబానీ, ఆనంద్ పిరమల్ వివాహం డిసెంబర్ 12న జరగనున్న సంగతి తెలిసిందే. పెళ్లికి ముందు రెండు రోజుల వేడుకను ఉదయ్‌పూర్‌లో జరుపుతున్నారు. శనివారం రాత్రి ప్రారంభమైన వేడుకలు నేటితో ముగియనున్నాయి. ఈ ప్రీ వెడ్డింగ్ సెలబ్రేషన్స్‌కు బాలీవుడ్‌కు మహామహులంతా హాజరయ్యారు. అలాగే అమెరికా మాజీ అధ్యక్షుడు బిల్‌క్లింటన్ భార్య హిల్లరీ క్లింటన్ కూడా విచ్చేశారు.
అయితే ఈ వార్తలన్నింటికన్నా మరో విషయం ఇప్పుడు సోషల్ మీడియాలో వైరల్ అవుతోంది. ఉదయ్‌పూర్‌లో పెళ్లి వేడుకలు ప్రారంభం సందర్భంగా అక్కడి ప్రజలకు అంబానీ ప్రత్యేక ‘అన్న సేవ’ ఏర్పాటు చేశారు. పిల్లా, పెద్దా అందరినీ ఆహ్వానించారు. ముఖేశ్ అంబానీ, నీతా అంబానీ, ఈషా అంబానీతో పాటు వరుడు ఆనంద్ తల్లితండ్రులు అజయ్ పిరమల్, స్వాతి పిరమల్ స్వయంగా ఉదయ్‌పూర్ ప్రజలకు ఆహార పదార్థాలు వడ్డించారు. ‘వంటకాలు బాగున్నాయా.. మనస్ఫూర్తిగా తినండి’ అంటూ దగ్గరుండి విందు భోజనాన్ని పెట్టించారు. ఈ అన్న సేవను శుక్రవారం నుంచి సోమవారం వరకు రోజుకు మూడు సార్లు నిర్వహించనున్నట్లు అంబానీ సన్నిహితులు వెల్లడించారు.
‘ఉదయ్‌పూర్ ప్రజలపై గౌరవంతో, వారి ఆశీస్సులు తమ కుమార్తెకు ఉండాలనే కోరికతో అంబానీ దంపతులు ఈ ప్రత్యేక విందును ఏర్పాటుచేశారు. మొత్తం 5,100 మందికి ఈ అన్నదానం జరుగుతుంది. డిసెంబర్ 7 నుంచి 10 వరకు రోజుకు మూడు సార్లు చేపడతారు. ప్రీ వెడ్డింగ్ ఫంక్షన్‌లో భాగంగానే ఇదీ జరుగుతోంది’ అని అంబానీ కుటుంబానికి చెందిన ఒకరు చెప్పారు. కాగా, అంబానీ దంపతులు ఎంతో సంతోషంగా ఉదయ్‌పూర్ ప్రజలకు ఆహార పదార్థాలు వడ్డిస్తోన్న ఫొటోలు ప్రస్తుతం సోషల్ మీడియాలో వైరల్ అవుతున్నాయి. ‘డబ్బు మనుషులను, వారి నైతిక విలువలను మార్చేస్తుందని ఎవరన్నారు. ఇవిగో ఈ ఫొటోలు చూస్తే అది తప్పు అని మీరే అంటారు’ అంటూ చాలా మంది ట్వీట్లు పెడుతున్నారు.