పాక్ చేతిలో రూ.2000 నోట్ల సెక్యూరిటీ ఫీచర్లు

నకిలీ రూ. 2000 నోటును ముద్రించడం దాదాపు అసాధ్యమని ఆర్‌బీఐ ప్రకటించిన విషయం గుర్తుందా? ఇక పాక్ ఆటలు సాగవని మనం తెగ మురిసిపోయాం కదూ. కానీ.. పాకిస్థాన్‌కు చెందిన ఇంటర్ సర్వీసెస్ ఇంటెలిజెన్స్ (ఐఎస్ఐ) రూ. 2000 నోటులో 8 నుంచి 10 సెక్యూరిటీ ఫీచర్లను కాపీ కొట్టిందంటూ ఇంటెలిజెన్స్ బ్యూరో, నేషనల్ ఇన్వెస్టిగేషన్ ఏజెన్సీ బాంబు పేల్చాయి. అయితే ఇప్పటి వరకూ ఐఎస్‌ఐకి, దాని ఆధ్వర్యంలో నడిచే ఉగ్రవాద సంస్థలకు.. నోట్లను ముద్రించడానికి అవసరమైన నాణ్యమైన పేపర్ దొరకలేదని చెప్పింది. వెంటనే ఈ విషయంలో చర్యలు తీసుకోవాలని ప్రభుత్వాన్ని నిఘా విభాగం అప్రమత్తం చేసింది. ఈ పేపర్లను భారత ప్రింటింగ్ ప్రెస్‌లకు సరఫరా చేసే వారి నుంచి ఐఎస్‌ఐ ఈ పేపర్ పొందకుండా చూడాలని సూచించింది.

ఈ వారం ప్రారంభంలో ఎన్ఐఏ బీఎస్ఎఫ్ జవాన్ల సాయంతో క్వాలిటీ పరంగా అత్యున్నతంగా ఉన్న రూ.2000 నకిలీ నోట్లను మాల్డా ప్రాంతంలో సీజ్ చేసింది. వీటిని బంగ్లాదేశ్ గుండా భారత్‌లోకి తీసుకొచ్చారు. వీటిలో చాలా సెక్యూరిటీ ఫీచర్లను పొందుపర్చారని కానీ, కాగితం నాణ్యత మాత్రం కొంచెం తక్కువగా ఉందని చెప్పారు. రూ. 500 నోట్ల సెక్యూరిటీ ఫీచర్లను కూడా కాపీ కొట్టేందుకు పాక్ ప్రయత్నిస్తోందని తేలింది.

అంతేకాదు కరాచీ శివార్లలో దావుద్ కంపెనీ సౌజన్యంతో ఐఎస్ఐ నోట్ల ప్రింటింగ్ ప్రెస్‌ను ఏర్పాటు చేసిందని.. మన నిఘా సంస్థలు అనుమానిస్తున్నాయి. బంగ్లాదేశ్ గుండా భారత్‌లోకి వచ్చిన నకిలీ నోట్లు కూడా కరాచీలో ప్రింట్ అయినవేనని నిఘా సంస్థలు భావిస్తున్నాయి.