పాక్‌లో వేగంగా విస్తరిస్తోన్న ఐఎస్.. భారత్‌కు ముప్పు!

ప్రపంచ దేశాలను భయపెడుతూ, అత్యంత కిరాతకమైన ఉగ్రవాద సంస్థగా పేరుపొందిన ఇస్లామిక స్టేట్ తీవ్రవాదం దాయాది దేశంలో వేగంగా విస్తరిస్తున్నట్లు తాజా నివేదిక తెలియజేసింది. పాకిస్థాన్ ఇనిస్టిట్యూట్ ఫర్ పీస్ స్టడీస్ సంస్థ వెల్లడించిన గణాంకాల ప్రకారం.. ముఖ్యంగా ఉత్తర సింధ్, బలూచిస్థాన్ ప్రాంతాల్లో ఐఎస్ విస్తృతంగా వ్యాపిస్తోందని పేర్కొంది. గతేడాది బలూచిస్థాన్‌లో ఇద్దరు చైనా పౌరులను హత్య చేసింది కూడా ఐఎస్ ఉగ్రవాదులేనని తెలిపింది. మరోవైపు, బలూచ్ స్వాతంత్ర్యం కోసం పోరాడుతున్న సంస్థల కన్నా తెహ్రీక్ ఇ తాలిబాన్ పాకిస్థాన్, జమాతుల్ అహ్రార్ సంస్థలు పాక్ భద్రతకు పెను ప్రమాదంగా పరిణమించాయని తెలిపింది.

2016తో పోలిస్తే ​ ఆఫ్గన్, భారత్ సరిహద్దుల్లో 2017లో పాక్‌పై సీమాంతర ఉగ్రదాడులు 131 శాతం పెరిగాయని ఆ నివేదిక వ్యాఖ్యానించింది. గతేడాది పాక్‌లో జరిగిన దాడుల్లో ఆరింటికి తామే కారణమని ఐఎస్ పేర్కొన్నా, అవి అత్యంత భయకరమైనవని ఆ సంస్థ వ్యాఖ్యానించింది. ఈ అంశాన్ని తీవ్రంగా పరిగణించి చర్యలు తీసుకోవాలని, ఎందుకంటే భవిష్యత్తులో విదేశీ ఉగ్రవాదులు పాక్‌లో చొరబడే అవకాశం ఉందని, దీని వల్ల మధ్య ఆసియాలో అనూహ్య మార్పులు చోటుచేసుకుంటాయని పిఐపీఎస్ అధికారి మహ్మద్ ఇస్మాయిల్ ఖాన్ తెలిపారు. వీరి ప్రాబల్యం పెరగకుండా ప్రభుత్వం చర్యలు తీసుకోవాలని, దీని కోసం కార్యచరణ రూపొందించాలని పాక్ ప్రభుత్వానికి సూచించింది.

ఐఎస్ ప్రాబల్యం పెరిగితే భారత్ భద్రతకు కూడా ముప్పేనని విశ్లేషకులు అంటున్నారు. దేశంలోని 64 జిల్లాల్లో సుమారు 370 ఉగ్రదాడులు జరిగాయాని, వీటిలో 24 ఆత్మాహుతి దాడులు, మరికొన్ని తుపాకీ- సూసైడ్ దాడులు ఉన్నాయి. వీటి కారణంగా 815 మంది ప్రాణాలు కోల్పోయారని నివేదిక తెలియజేసింది. పాక్ లో ఐఎస్ ప్రాబల్యం పెరిగితే భారత్ భద్రతకు కూడా పెను ప్రమాదంగా మారుతుందని పేర్కొంటున్నారు.