యాప్నగరం

మేఘాలయ ఎన్నికల్లో ఓటేయనున్న ఇటలీ, అర్జెంటీనా, స్వీడన్, గోవా..!

మేఘాలయ అసెంబ్లీ ఎన్నికల ఓటింగ్‌లో ఇటలీ, స్వీడన్, త్రిపుర, గోవా, అర్జెంటీనా కూడా ఓటేయనున్నాయి. ఇదెక్కడి విచిత్రమో చూడండి..

TNN 13 Feb 2018, 9:01 pm
మేఘాలయ రాష్ట్రంలో ఫిబ్రవరి 27న అసెంబ్లీ ఎన్నికలు జరగనున్న విషయం తెలిసిందే. ఈ ఎన్నికల్లో ఇటలీ, అర్జెంటీనా, ఇండోనేషియా, స్వీడన్‌ ఓటు హక్కు వినియోగించుకోబోతున్నాయి. అంతేకాదు.. త్రిపుర, గోవా కూడా ఓటు వేస్తాయి. మేఘాలయలో ఎన్నికలైతే.. పక్క రాష్ట్రాలు, విదేశాలు ఓటింగ్‌లో పాల్గొనడమేంటి అని ఆశ్చర్యపోతున్నారా..! ఎన్నికల అధికారులు కూడా ఇలాగే ఆశ్చర్యపోయారు. ఆ తర్వాత అసలు విషయం తెలిసి కడుపు చెక్కలయ్యేలా నవ్వుకున్నారు. ఇంతకీ ఈ ఉదంతం వెనుక ఉన్న రహస్యమేంటో చూడండి..
Samayam Telugu italy argentina and goa to vote in meghalaya assembly polls
మేఘాలయ ఎన్నికల్లో ఓటేయనున్న ఇటలీ, అర్జెంటీనా, స్వీడన్, గోవా..!


మేఘాలయలోని తూర్పు ప్రాంతం కొండ ప్రాంతాలకు ప్రసిద్ధి. ఇక్కడ ఖాసీ తెగకు చెందిన ప్రజలు ఎక్కువగా నివసిస్తున్నారు. ఖాసీ కొండల తూర్పు ప్రాంతంలో ఉమ్నిహ్, తమర్, ఎలక లాంటి చిన్న చిన్న గ్రామాలున్నాయి. ఇండియా-బంగ్లాదేశ్ సరిహద్దుకు అత్యంత సమీపంగా ఉండే ఈ గ్రామాల్లోని ప్రజల పేర్లన్ని వింతే.

సాధారణ పేర్లకు ఏమాత్రం సంబంధం లేకుండా.. రాష్ట్రాలు, దేశాలు, టేబుళ్లు, బల్లల పేర్లు ధ్వనించేలా ఖాసీ ప్రజల పేర్లు ఉంటాయి. ఇక్కడి ప్రజల పేర్లకు ఆంగ్లంలో వింతగొలిపే అర్థాలు స్ఫురిస్తాయి. అసలు కొన్ని పేర్లకు సరైన అర్థాలే లేకపోవడం మరో విచిత్రం.

గోవా, అర్జెంటీనా, స్వీడన్, టేబుల్, పేపర్, స్వెటర్, గ్లోబ్.. ఇలా అక్కడి ఓటర్ల పేర్లన్నీ వింతే. మరో చిత్రమైన విషయం ఏంటంటే.. ‘స్వెటర్’ అనే ఓ తల్లి తన బిడ్డకు ‘నేను ప్రసవించాను’ అనే పేరు పెట్టింది. ఖాసీ పేర్లకు ఇంగ్లిష్‌లో అర్థాలు వెతికితే ఇలాంటి వింతలు బయటపడ్డాయి. ఎన్నికల అధికారులు ఓటర్ల జాబితాను బయటపెట్టడంతో ఈ చిత్ర విచిత్రమైన పేర్లన్నీ హాట్ టాపిక్‌గా మారాయి.

ఎలకా గ్రామ సర్పంచ్ ‘ప్రీమియర్ సింగ్’.. తన తండ్రి తనకు ఆ పేరు పెట్టడం పట్ల మురిసిపోతున్నాడు. తన ప్రస్తుత స్థాయికి తగ్గట్టుగా ఆ పేరు ఉందని గర్వంగా చెబుతున్నాడు. ఎలకా గ్రామంలో మొత్తం 850 మంది పురుష, 916 మంది మహిళా ఓటర్లు ఉన్నారు. గ్రామంలో ఎక్కువగా నిరక్షరాస్యులు ఉండటం వల్లే తమ పిల్లలకు ఇలాంటి అర్థంపర్థం లేని పేర్లు పెట్టుకున్నట్లు విశ్లేషకులు చెబుతున్నారు.

మేఘాలయా ఎన్నికల్లో పోటీ చేస్తున్న కొంత మంది వ్యక్తులకు కూడా వింత పేర్లుండటం విశేషం. అర్థంపర్థంలేని పేర్లున్న వారే కాకుండా.. నెహ్రూ సూటింగ్, నెహ్రూ సంగ్మా, ఫ్రాంకెన్ స్టీన్, కెన్నడీ లాంటి ప్రముఖుల పేర్లున్న వ్యక్తులు కూడా ఈ ఎన్నికల్లో పోటీ చేస్తున్నారు.

Read this in Hindi

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.