జమ్మూలో రోడ్డెక్కిన కూలీలు.. భారీ ర్యాలీ, నిరసన

జమ్మూ కశ్మీర్‌లో వేలాది మంది రోజువారీ కూలీలు నిరసన బాటపట్టారు. జల్‌శక్తి శాఖకు చెందిన వాళ్లంతా రోడ్డెక్కి భారీ ర్యాలీ చేపట్టారు. అక్కడున్న వంతెనను దిగ్బంధించారు. తమను క్రమబద్ధీకరణ చేయాలని, పెండింగ్‌లో ఉన్న వేతనాలను విడుదల చేయాలని ఎప్పటి నుంచో వారంతా డిమాండ్ చేస్తున్నారు. కార్మికులందరూ గతవారం రోజులగా టూల్ డౌన్ చేసి సమ్మె చేస్తున్నారు. అయినా సరే పట్టించుకోకపోవడంతో బుధవారం రోడ్డు, వంతెనలను బ్లాక్ చేశారు. దీనివల్ల నగరంలో భారీ ట్రాఫిక్ జామ్ ఏర్పడింది.

లెఫ్టినెంట్‌ గవర్నర్‌, బీజేపీకి వ్యతిరేకంగా నినాదాలు చేస్తూ సెక్రటేరియట్‌లోకి చొచ్చుకెళ్లేందుకు ప్రయత్నించారు. అయితే శాంతి భద్రతల పరిరక్షణకు బలవంతంగా వచ్చిన వారిని పోలీసు సిబ్బంది అడ్డుకున్నారు. ఈ క్రమంలో పోలీసులకు, రోజువారీ కూలీలకు మధ్య వాగ్వాదం చోటుచేసుకుంది. ఈ సందర్భంగా "మేము మొదట జూన్ 22న 48 గంటల సుదీర్ఘ టూల్ డౌన్ సమ్మెకు పిలుపునిచ్చాం. కానీ ప్రభుత్వం పట్టించుకోలేదు. మా నిజమైన డిమాండ్లకు మద్దతుగా మా ఆందోళనను తీవ్రతరం చేశాం." అని నిరసనకారుల నేత రవిహన్స్ అన్నారు.

60,000 మందికిపైగా దినసరి కూలీలు, సాధారణ కార్మికులు, ఇతర కార్మికులు రెండు దశాబ్దాలుగా వివిధ విభాగాల్లో తమ విధులను నిర్వహిస్తున్నారు. వారి ఉద్యోగాలను రెగ్యులరైజ్ చేయాలని, పెండింగ్ వేతనాలను విడుదల చేయాలని కోరుతున్నారు. కానీ వారి డిమాండ్‌లను పట్టించుకోవడం లేదని ఆగ్రహంతో... నిరసన ప్రదర్శనలకు దిగారు. ఈ ప్రభుత్వం తప్పుడు హామీలు ఇచ్చి కాలయాపన చేస్తోందని వారంతా విమర్శిస్తున్నారు. ఎంతో మంది అధికారులను కలిశాం అని, తమ హామీలను నెరవేరుస్తామని హామీ ఇచ్చారు కానీ ఇప్పటి వరకు నెరవేర్చలేదని ఆరోపించారు. ఇప్పటికైనా తమ డిమాండ్లను అంగీకరించారని, లేదంటే తమ ఉద్యమాన్ని మరింత తీవ్రతరం చేస్తామని హెచ్చరించారు.