నిషేదాజ్ఞలు బేఖాతర్: జబర్దస్త్‌గా జల్లికట్టు

తమిళనాడులో సుప్రీంకోర్టు తీర్పుకు చుక్కెదురైంది. ప్రాణాంతకమైన జల్లికట్టు (ఎద్దులతో ఆడుకోవడం) నిర్వహించరాదని సుప్రీంకోర్టు స్పష్టమైన నిషేదాజ్ఞలు జారీ చేసినా..రాష్ట్రంలో జల్లికట్టు జరుపుకుంటున్నారు.

యేటా సంక్రాంతి పండుగ సందర్భంగా జల్లికట్టు ఘనంగా నిర్వహిస్తారు. అయితే ‘పెటా’ వంటి జంతు సంరక్షణ సంస్థలు సుప్రీంకోర్టును ఆశ్రయించడంతో జల్లికట్టు నిషేదానికి ఉన్నత న్యాయస్థానం ఆదేశాలు జారీ చేసింది.

సుప్రీంకోర్టు తీర్పుపై తమిళనాడు ప్రభుత్వం, ప్రతిపక్షాలు నిరసన వ్యక్తం చేశాయి. అనుమతి లేకపోయినా సంప్రదాయ పండుగైనా...జల్లికట్టు నిర్వహించి తీరుతామని హెచ్చరించాయి. అన్నట్లుగా తమిళనాడు మెజార్టీ ప్రాంతాల్లో జల్లికట్టు యథేచ్చగా జరుగుతోంది.

బరిగీసిన ప్రాంతంలో గిత్తలను రంగంలోకి దించి పరుగెత్తిస్తారు. వాటిని యువకులు అదుపు చేయడం..ఎద్దులు తిరగబడటం..దీంతో క్రియేట్ అయ్యే ఫన్ ను తిలకించే ప్రజలు ఎంజాయ్ చేస్తారు.

మధురై వంటి ప్రాంతాల్లో అన్ని రాజకీయపార్టీల నేతలు జల్లికట్టు నిర్వహిస్తున్నారు. కొన్నిచోట్ల పోలీసులు జల్లికట్టు నిర్వాహకులను అదుపులోకి తీసుకుంటున్నారు.

రేపటి నుంచి రాష్ట్రవ్యాప్తంగా జల్లికట్టు నిర్వహిస్తామని పలు సంప్రదాయ సంఘాలు హెచ్చరిస్తున్నాయి.

అటు జల్లికట్టు నిర్వహణకు తమిళ సినీ ఇండస్ట్రీ సంపూర్ణ మద్దతు ప్రకటించింది.