సాగరతీరాన చలిమంటలు, ఛాయ్-సమోస!

వణుకుపుట్టించే చలిలోనూ చెన్నై సముద్రతీరం మెరీనా బీచ్‌లో వేలాదిగా జనం జల్లికట్టు క్రీడకు అనుమతించాలంటూ ఆందోళన చేస్తున్నారు. మంగళవారం సాయంత్రం నుంచి మెరీనా బీచ్ వద్ద ఆందోళనకారుల సంఖ్య రోజురోజుకు పెరుగుతోంది.

గురువారం రాత్రి దాదాపు 15వేల మంది జనం బీచ్ వద్ద ఆందోళనలో పాల్గొన్నట్లు అంచనా. మెరీనా బీచ్ లో జల్లికట్టుకోసం చేపట్టిన ఆందోళన రాష్ట్రవ్యాప్తంగా ప్రజలను ఉద్యమంలో పాల్గొనేలా చేస్తోంది.

మెరీనా బీచ్ యువతీ యువకులు నాలుగు రోజులు ఆందోళనలు కొనసాగిస్తుంటే..ప్రభుత్వ, ప్రైవేటు ఉద్యోగులు విధులు ముగించుకొని రాత్రి ఆందోళనలో పాల్గొంటున్నారు.

మెరీనా బీచ్ లో గురువారం రాత్రి చలిమంటలు వేసుకొని పాటలు పాడుతూ గడిపారు. ఆందోళనకు మద్దతుగా వచ్చి మాట్లాడేవారికోసం దాదాపు ఎనిమిది చోట్ల స్టేజీలు, మైకు సెట్లు ఏర్పాటు చేశారు.

వివిధ పార్టీలు, స్వచ్ఛంద సంఘాలు బీచ్ వద్ద వంటలు వండి ఆందోళన కారులకు వడ్డిస్తున్నారు. సాంబారు అన్నం, పెరుగన్నం, వెజ్ బిర్యానీ మెనుగా ఉంటున్నాయి. గృహిణీలు, వృద్ధులు, చిన్నపిల్లలు సైతం ఆందోళనలో పాల్గొంటూ తమవంతు సాయం అందిస్తున్నారు.

డిన్నర్ తర్వాత ఛాయ్ సమోసాలు సైతం అందిస్తున్నారు.

జిల్లికట్టు పోరాటానికి మద్దతుగా ఏఆర్ రెహ్మాన్ శుక్రవారం దీక్ష చేపట్టనున్నారు. తమిళనాడులో బంద్ కొనసాగనుంది. వ్యాపార దుకాణాలు స్వచ్ఛందంగా మూసేయగా.. తమిళ సినీ ఇండస్ట్రీ సినిమాల షూటింగ్ నిలిపివేశారు.