జల్లికట్టు ఆందోళనకు తాత్కాలిక విరమణ

జల్లికట్టు ఆందోళనలతో తమిళనాడు అట్టుడుకుతున్న సంగతి తెలిసిందే. ముఖ్యంగా మెరీనా బీచ్ లోని ఆందోళన హింసాత్మకంగా మారింది. అనేక మంది పోలీసులు, విద్యార్థులు తీవ్రంగా గాయపడ్డారు. కాగా వారం రోజుల పాటూ చేస్తున్న తమ ఆందోళనకు మెరీనా బీచ్ లోని యువత విరామాన్ని ఇస్తున్నట్టు ప్రకటించారు. ఈ విరమణ తాత్కాలికమేనని, భవిష్యత్తు కార్యాచరణను త్వరలోనే ప్రకటిస్తామని చెప్పారు.

కాగా జల్లికట్టుకు ఆరునెలల ఆర్డినెన్స్ ను తీసుకొచ్చిన తమిళనాడు ప్రభుత్వం ఆందోళనను విరమించాలని కోరింది. రిపబ్లిక్ డే వేడుకలకు మెరీనా బీచ్ ను సిద్ధం చేయాలని, అందుకోసం అక్కణ్నించి వెళ్లిపోవాలని ఆందోళన కారులను కోరింది. మొదట ససేమిరా ఉద్యమం ఆపేది లేదన్న యువత... కాస్త మెత్తబడి ఆందోళనను తాత్కాలికంగా నిలిపివేస్తున్నట్టు చెప్పారు. ఇప్పటికే చాలా మంది అక్కణ్నించి వెళ్లిపోయారు.

తమిళ స్టార్ హీరోలు రజనీకాంత్, కమల్ హాసన్ కూడా ఆందోళనను విరమించాలని విద్యార్థులను కోరారు. రజనీకాంత్ ఆందోళనకారులకు బహిరంగా ఉత్తరం రాశారు. ఆందోళన పక్కదారి పడుతోంది, కొన్ని అరాచక శక్తులు హింసను సృష్టించి జల్లికట్టు ఆందోళనకు చెడ్డపేరు తెస్తున్నాయని తెలిపారు.