కశ్మీర్: వృద్ధనేత సంచల నిర్ణయం.. హురియత్ కాన్ఫరెన్స్‌‌కు రాంరాం

కశ్మీర్‌కు చెందిన సీనియర్ వేర్పాటువాద నేత, హురియత్ కాన్ఫరెన్స్ జీవితకాల అధ్యక్షుడు సయ్యద్ అలీ షా గిలానీ ఆ పార్టీ నుంచి వైదొలగుతున్నట్టు ప్రకటించారు. ఈ మేరకు ఆయన తరఫున అధికార ప్రతినిధి ఓ నాలుగు పేజీల లేఖ సహా ఆడియోను సోమవారం విడుదల చేశారు. హురియత్ నుంచి తాను వైదొలగడానికి గల కారణాలు తన లేఖలో గిలానీ ప్రస్తావించారు. ప్రస్తుతం పాక్ ఆక్రమిత కశ్మీర్‌లో ఉన్న హురియత్ సభ్యుల కార్యకలాపాల విషయంలో వస్తున్న వివిధ ఆరోపణలపై దర్యాప్తు చేస్తున్నట్లు గిలానీ తెలిపారు.

‘పీఓకేలోని ప్రతినిధుల కార్యకలాపాలు, సమావేశాలు అక్కడి ప్రభుత్వంలో చేరడానికి, మంత్రి పదవులు పొందడానికి మాత్రమే పరిమితమయ్యాయి. కొంత మంది సభ్యులను బహిష్కరించగా, మరికొందరు సొంతంగా సమావేశాలను నిర్వహించడం ప్రారంభించారు.. ఇక్కడ జరిగిన సమావేశంలో ఈ కార్యకలాపాల నిర్వహణ, వారి నిర్ణయాలను ఆమోదించారు’ అని గిలానీ తన లేఖలో పేర్కొన్నారు.

జమ్మూ కశ్మీర్‌కు ప్రత్యేక హోదాను రద్దు చేసి, రాష్ట్రాన్ని రెండు కేంద్రపాలిత ప్రాంతాలుగా విభజన సమయంలో హురియత్ సభ్యుల వ్యవహరించిన తీరును ఆయన ప్రస్తావించారు. ‘నేను వివిధ మార్గాల ద్వారా మీకు సమాచారాన్ని పంపానని, తద్వారా తదుపరి చర్యను నిర్ణయించవచ్చు కానీ, నా ప్రయత్నాలు ఫలించలేదు. ఇప్పుడు ఆర్థిక, ఇతర అవకతవకలకు సంబంధించిన జవాబుదారీ అనే కత్తి మీ తలపై వేలాడుతోంది.. సలహా కమిటీ సమావేశాన్ని ఏర్పాటుచేయాలని భావించారు’ అని హురియత్ సభ్యులకు గిలానీ ఘాటుగా లేఖ రాశారు.

హురియత్ కాన్ఫరెన్స్ పగ్గాలు చేపట్టమని 2003లో పార్టీలు బలవంతం చేశాయని, తరువాత జీవితకాల ఛైర్మన్‌ను చేశాయని గిలానీ చెప్పారు.‘క్రమశిక్షణ తప్పడం, ఇతర లోపాలను విస్మరించారు.. బలమైన జవాబుదారీతనం వ్యవస్థను స్థాపించడానికి ఏళ్లుగా చేసిన ప్రయత్నాలు ఫలించలేదు.. కానీ ఈ రోజు, మీరు అన్ని హద్దులను అతిక్రమించి నాయకత్వానికి వ్యతిరేకంగా తిరుగుబాటుకు పాల్పడ్డారు’ అని ఆగ్రహం వ్యక్తం చేశారు.