జమ్మూ కశ్మీర్‌ పునర్విభజన.. కశ్మీరీలను బుజ్జగించేలా అమిత్ షా వ్యాఖ్యలు

‘జమ్మూ కశ్మీర్ పునర్విభజన బిల్లు-2019’ను రాజ్యసభ ఆమోదించింది. సోమవారం (ఆగస్టు 5) పెద్దల సభలో ఓటింగ్‌లో నిర్వహించగా.. బిల్లుకు అనుకూలంగా 125 మంది సభ్యులు, వ్యతిరేకంగా 61 మంది ఓటు వేశారు. ఒకరు తటస్థంగా వ్యవహరించారు. బిల్లు ప్రవేశపెట్టిన సందర్భంగా హోం మంత్రి అమిత్ షా కీలక వ్యాఖ్యలు చేశారు. ప్రతిపక్షాలపై తీవ్రస్థాయిలో విమర్శలు గుప్పించిన ఆయన.. కేంద్రం నిర్ణయంతో జమ్మూ కశ్మీర్ ప్రజలు 18 శతాబ్ది నుంచి బయటకొచ్చి 21వ శతాబ్దిలో జీవించడానికి వీలవుతుందన్నారు.

‘‘ఆయుష్మాన్ భారత్ పథకం కశ్మీర్లో కూడా ఉంది. కానీ హాస్పిటల్స్ ఎక్కుడున్నాయి..? కశ్మీర్లో డాక్టర్లు, నర్సులు ఎక్కడున్నారు? ఆర్టికల్ 35ఏను సపోర్ట్ చేస్తున్న వారు.. అక్కడికి ప్రముఖ డాక్టర్ ఎవరైనా వెళ్లి ప్రాక్టీస్ చేయగలరేమో చెప్పండి? ఒకవేళ వెళ్లినా ఆయన భూమి కొనుక్కోలేడు, ఇల్లు కట్టుకోలేడు. అతడి పిల్లలకు ఓటేసే హక్కు ఉండదు.

మత రాజకీయాలను, ఓటు బ్యాంక్ రాజకీయల పట్ల మాకు నమ్మకం లేదు. కశ్మీర్లో కేవలం ముస్లింలు మాత్రమే నివసించాలా? ముస్లింలతోపాటు హిందువులు, సిక్కులు, జైనులు, బుద్ధులు.. ఇలా అన్ని మతాల వారూ అక్కడ జీవించాలి. ఆర్టికల్ 370, ఆర్టికల్ 35ఏ కారణంగా జమ్మూ కశ్మీర్లో ఇప్పటి వరకూ పూర్తి స్థాయిలో ప్రజాస్వామ్యాన్ని అమలు చేయలేకపోయాం. కశ్మీర్ అభివృద్ధికి నోచుకోలేదు. ఆర్టికల్ 370 వల్ల కశ్మీర్లో మూడు కుటుంబాలే బాగుపడ్డాయి.

జమ్మూ కశ్మీర్ ఎంత కాలం కేంద్ర పాలిత ప్రాంతంగా ఉంటుందని చాలా మంది ఎంపీలు అడుగుతున్నారు. వాళ్లకు నేను భరోసా ఇస్తున్నా.. అక్కడ పరిస్థితులు సాధారణ స్థితికి చేరినప్పుడు, సరైన సమయం వచ్చినప్పుడు జమ్మూ కశ్మీర్‌ను రాష్ట్రంగా మార్చడానికి మేం సిద్ధంగా ఉన్నాం. దీనికి కొంచెం ఎక్కువ సమయం పడుతుందేమో కానీ.. ఏదో ఒకరోజు జమ్మూ కశ్మీర్ మళ్లీ రాష్ట్రంగా మారుతుంది’’ అని అమిత్ షా తెలిపారు.

Read Also: శ్యామ్ ప్రసాద్ ముఖర్జీ కల నెరవేరిందిRead Also: జమ్మూ కశ్మీర్ పునర్విభజన.. అమిత్ షా కీలక వ్యాఖ్యలు