అమర్‌నాథ్ యాత్రకు బ్రేక్.. తక్షణమే వెనక్కి వెళ్లాలని ఆదేశాలు!

అమర్‌నాథ్ యాత్రికులు తక్షణమే వెనక్కి వచ్చేయాలని జమ్మూ కశ్మీర్ ప్రభుత్వం సూచించింది. ఉగ్రవాద ముప్పు ఉందని ఇంటెలిజెన్స్ వర్గాలు సమాచారం ఇచ్చాయి. దీంతో ముందు జాగ్రత్త చర్యగా.. వెంటనే కశ్మీర్ లోయ నుంచి వెనక్కి మళ్లాలని శుక్రవారం యాత్రికులకు ఆదేశాలు జారీ చేసింది. కశ్మీర్లో బస చేయాలని భావిస్తోన్న పర్యాటకులు, యాత్రికులు సాధ్యమైనంత త్వరగా వెనక్కి వెళ్లాలని హోంశాఖ ప్రధాన కార్యదర్శి సూచించారు.

అత్యాధునిక పేలుడు పదార్థాలతో ఉగ్రవాదులు అమర్‌నాథ్ యాత్రికులపై దాడి చేసే ముప్పు ఉందని నిఘా సంస్థలు భారత ప్రభుత్వానికి సమాచారం అందించాయి. దీంతో వెంటనే అప్రమత్తమైన సైన్యం ఈ మార్గం వెంబడి తనిఖీలు చేపట్టగా.. పాకిస్థాన్‌లో తయారు చేసిన ల్యాండ్ మైన్‌, అమెరికన్ స్నిపర్‌తోపాటు భారీగా ఆయుధాలను శుక్రవారం ఉదయం గుర్తించారు.

కశ్మీర్‌కు అదనపు బలగాలను తరలిస్తున్న విషయమై జమ్మూ కశ్మీర్ డీజీపీ దిల్బాగ్ సింగ్ స్పందించారు. ఎన్నికలు, ఇతర కారణాలతో సైన్యాన్ని ఇతర ప్రాంతాలకు పంపామని, వారే ఇప్పుడు తిరిగొస్తున్నారని తెలిపారు.

జమ్మూ కశ్మీర్లోని టూరిస్టులు, యాత్రికులను బలవంతంగా వెనక్కి పంపిస్తున్నారని ఆ రాష్ట్ర మాజీ సీఎం ఒమర్ అబ్దుల్లా ఆరోపించారు. ‘‘గుల్మార్గ్ ప్రాంతంలోని హోటళ్లలో ఉంటున్న నా స్నేహితులను బలవంతంగా పంపిస్తున్నారు. పహల్గామ్, గుల్మార్గ్ ప్రాంతాల నుంచి వెనక్కి పంపడం కోసం ఆర్టీసీ బస్సులను ఉపయోగిస్తున్నారు. అమర్‌నాథ్ యాత్రకు ముప్పు ఉంటే.. గుల్మార్గ్‌ను ఎందుకు ఖాళీ చేయిస్తున్నార’’ని ఆయన ప్రశ్నించారు.

‘‘భయాన్ని వ్యాపింపజేయడం తేలిక. కానీ రాష్ట్రంలో ఏం జరుగుతుందో ఎవరూ చెప్పడం లేదు. ఆరేళ్లు జమ్మూ కశ్మీర్ సీఎంగా పనిచేశాను. నా దగ్గర చాలా ప్రశ్నలున్నాయి. కానీ వాటికి ఎవరి దగ్గరా సమాధానం లేదు. సగటు కశ్మీర్ పౌరుడికి దేన్ని నమ్మాలో దేన్ని నమ్మొద్దో అర్థం కావడం లేదు. ఇలాంటి పరిస్థితిలో గవర్నర్ ఎక్కడున్నారు?’’ అని ఒమర్ అబ్దుల్లా ప్రశ్నించారు.