భారతీయ అలంకరణకు షింజో దంపతుల నీరాజనం

భారత పర్యటన నిమిత్తం విచ్చేసిన జపాన్ ప్రధాని షింజో అబే దంపతులు.. అందరి చూపునూ తమవైపు తిప్పుకుంటున్నారు. భారతీయ సంప్రదాయ దుస్తుల్లో తళుక్కుమంటూ అలరిస్తున్నారు. బుధవారం (సెప్టెంబర్ 13) అహ్మదాబాద్‌లోని సబర్మతీ ఆశ్రమం సందర్శన సందర్భంగా.. జపాన్ ప్రధాని షింజో అబే తెల్లని కుర్తా పైజామా ధరించి, దానిపై నీలి రంగు జాకెట్ వేసుకున్నారు. అచ్చూ.. విదేశీ పర్యటనల సందర్భంగా ప్రధాని మోదీ డ్రెస్సింగ్ స్టైల్లో షింజో దర్శనమిచ్చి ఆకట్టుకున్నారు. మరోవైపు షింజో సతీమణి అకీ అబే.. గులాబీ రంగు సల్వార్ కమీజ్‌లో తళుక్కుమన్నారు.

తమ పర్యటన నిమిత్తం షింజో అబే, అకీ అబే దంపతులు ఇక్కడ ఉండేది కేవలం 2 రోజులే అయినా.. ఇండియాలో గడిపినంత కాలం ఇక్కడి వస్త్రాలంకరణలోనే మెరుద్దామని ముందే గట్టి సంకల్పం చేసుకొని వచ్చినట్లు కనిపిస్తోంది.

ఈరకంగా వారిద్దరూ భారతీయ సంప్రదాయం, అలంకరణకు నీరాజనం చెబుతున్నారు. భారత్-జపాన్ మధ్య చిరకాలంగా కొనసాగుతున్న స్నేహ బంధానికి ఇది అసలైన గౌరవం.