వెనక్కి తగ్గిన జాట్లు: ఆందోళన వాయిదా

విద్య, ఉద్యోగాల్లో రిజర్వేషన్లు కల్పించాలని డిమాండ్ చేస్తూ ఢిల్లీ ముట్టడికి వ్యూహం పన్నిన హర్యానా జాట్ సామాజిక వర్గం తమ ఆందోళనపై వెనక్కి తగ్గింది. ఆదివారం హర్యానా ముఖ్యమంత్రి మనోహర్ లాల్ ఖట్టర్‌తో సమావేశమైన జాట్ పెద్దలు అనంతరం ఆందోళనను రెండు వారాలపాటు వాయిదా వేస్తున్నట్లు ప్రకటించారు. అఖిల భారత జాట్‌ రిజర్వేషన్‌ సంఘర్షణ సమితి (ఎయిజాస్‌) అధ్యక్షుడు యశ్‌పాల్ మాలిక్ ఆదివారం మధ్యాహ్నం 12 గంటలకు ఖట్టర్‌తో భేటీ అయ్యారు. ప్రభుత్వ హామీని తాము నమ్ముతున్నామని, అందుకనే రేపటి ఢిల్లీ ముట్టడిని వాయిదా వేస్తున్నామని భేటీ అనంతరం యశ్‌పాల్ వెల్లడించారు.

మరోవైపు హర్యానా సీఎం ఖట్టర్ మాట్లాడుతూ.. జాట్ రిజర్వేషన్‌పై కేంద్రం నెరవేరుస్తుందని అన్నారు. వెనుకబడిన తరగతుల జాతీయ కమిషన్‌కు చైర్మన్, సభ్యులను నియమించిన వెంటనే రిజర్వేషన్ ప్రక్రియను ప్రారంభిస్తుందని స్పష్టం చేశారు. అంతవరకు ప్రజలు ప్రభుత్వానికి సహకరించాలని, రాష్ట్రంలో శాంతి, సామరస్యాలను నెలకొల్పాలని కోరారు. కాగా, సోమవారం ఢిల్లీ ముట్టడికి జాట్లు పిలుపునివ్వడంతో హర్యానా రాష్ట్ర పోలీసులతోపాటు, కేంద్ర బలగాలు అప్రమత్తమయ్యాయి. ఇప్పటికే రాష్ట్ర సరిహద్దులో 144 సెక్షన్‌ను అమలు చేస్తున్నాయి.

ఆందోళనను వాయిదా వేస్తున్నట్లు ప్రకటించగానే ఢిల్లీ ప్రజలు ఊపిరి పీల్చుకున్నారు. జాట్లు ఢిల్లీని ముట్టడిస్తే ట్రాఫిక్‌కు తీవ్ర అంతరాయం కలగడం ఖాయం. అందుకని సెంట్రల్ ఢిల్లీతోపాటు ఢిల్లీ ఎన్సీఆర్‌లోని రోడ్లు మూసేయాలని అధికారులు నిర్ణయించారు. మెట్రో రైళ్లు, పలు రైళ్ల సేవలను కూడా తాత్కాలికంగా నిలిపివేస్తారు. నొయిడా, గుర్గావ్‌లలో కూడా తీవ్రమైన ట్రాఫిక్ సమస్యలు తలెత్తుతాయి. పబ్లిక్ ట్రాన్స్‌పోర్ట్ అందుబాటులో లేకపోవడం వల్ల క్యాబ్, ఆటోల ధరలు కూడా ఆకాశాన్నంటే అవకాశం ఉంటుంది. కానీ ఆందోళనను జాట్లు వాయిదా వేసినట్లు ప్రకటించడంతో ఢిల్లీ ప్రజలు ఎంతో సంతోషం వ్యక్తం చేస్తున్నారు.