ప్రభుత్వానికి, పార్టీకి దూరంగా వుండండి: శశికళ

తమిళనాడు ప్రభుత్వానికి, ఏఐఏడీఎంకే పార్టీకి దూరంగా ఉండండి అంటూ తన కుటుంబసభ్యులు, తోబుట్టువులు, మేనల్లుళ్లు, మేనకోడళ్లను హెచ్చరించారు దివంగత ముఖ్యమంత్రి జయలలిత సన్నిహిత మిత్రురాలు శశికళ. ప్రభుత్వ కార్యకలాపాలు, పార్టీ కార్యక్రమాల్లో మీరు కలగజేసుకోరాదు అని శశికళ తన కుటుంబసభ్యులని ఆదేశించినట్టు ఆమె కుటుంబానికి దగ్గరిగా మెదిలే సన్నిహితవర్గాలు తెలిపాయి పోస్ గార్డెన్‌లోని జయలలిత నివాసంలో బుధవారం జరిగిన సమావేశంలో శశికళ ఈ ఆదేశాలు జారీ చేసినట్టు సదరు వర్గాలు పేర్కొన్నాయి.

రాజాజీహాలులో జయలలిత పార్ధీవదేహాన్ని ఉంచినప్పుడు మొదలుకుని అంత్యక్రియలు పూర్తయ్యేవరకు శశికళ కుటుంబసభ్యులు ఆమె మృతదేహాన్ని విడవకపోవడంపై సోషల్ మీడియాలో కొన్ని విమర్శలు వ్యక్తమయ్యాయి. అంతేకాకుండా జయలలిత మృతి వెనుక శశికళ హస్తం వుందా అనే ఆరోపణలు వినిపిస్తున్న ప్రస్తుత నేపథ్యంలో తన కుటుంబాన్ని పార్టీకి, ప్రభుత్వానికి దూరం పెట్టడం ద్వారా ఆ విమర్శలకి సరైన సమాధానం ఇవ్వవచ్చనేది శశికళ ఆలోచన అయ్యుంటుంది అనే అభిప్రాయాలు కూడా వినిపిస్తున్నాయి.