ఇంకాసేపట్లో హెల్త్ బులెటిన్.. సర్వత్రా ఉత్కంఠత

తమిళనాడు సీఎం జయలలిత ఆరోగ్య పరిస్థితిపై వస్తోన్న వదంతులని నమ్మవద్దని అపోలో ఆస్పత్రివర్గాలు విజ్ఞప్తి చేసినప్పటికీ... తమిళ ప్రజలు, జయ అభిమానుల్లో ఉన్న ఆందోళన మాత్రం తొలగడం లేదు. ఆమె శరీరం వైద్యానికి సహకరిస్తోంది కానీ ప్రస్తుతానికైతే ఆమె ఆరోగ్య పరిస్థితి విషమంగానే వుందని సోమవారం సాయంత్రం అపోలో డాక్టర్లు చేసిన ప్రకటన అమ్మ అభిమానులకి ఆ క్షణం వరకు తాత్కాలికంగా ఊరట కలిగించినప్పటికీ.. ఇకపైనైనా ఏ క్షణం ఎటువంటి వార్త వినాల్సి వస్తుందోననే భయం వారిలో నెలకొని వుంది. దీంతో అపోలో ఆస్పత్రి ఆరణలోనేకాకుండా తమిళనాడు వ్యాప్తంగా ఉద్రిక్త పరిస్థితులు కొనసాగుతున్నాయి.

సాయంత్రం జయ ఆరోగ్య పరిస్థితిపై స్పందించిన ఆస్పత్రివర్గాలు... రాత్రి 11 గంటలకి కూడా ఆమె ఆరోగ్య పరిస్థితిపై హెల్త్ బులెటిన్ విడుదల చేస్తామని తెలిపారు. దీంతో రాత్రి 11 గంటలకి విడుదల కావాల్సి వున్న హెల్త్ బులెటిన్ కోసం జయ అభిమానులు, పార్టీ కార్యకర్తలు, రాష్ట్ర ప్రజలు ఉత్కంఠతో ఎదురుచూస్తున్నారు. రాత్రి 12 గంటలు అవుతున్నప్పటికీ ఈ హెల్త్ బులెటిన్ విడుదల చేయకపోవడంపై జయలలిత అభిమానుల్లో ఆందోళన వ్యక్తమవుతోంది. ఈ హెల్త్ బులెటిన్ విడుదల చేస్తే, ఈసారి ఏం వినాల్సి వస్తుందో అనే భయాందోళన సైతం వారిని వెంటాడుతోంది.

అయితే, ఈ హెల్త్ బులెటిన్ విడుదల చేయడానికన్నా ముందు పూర్తి చేయాల్సిన కొన్ని వైద్య పరీక్షలు, వాటి ఫలితాల కోసం వేచిచూడటం వల్లే ఈ హెల్త్ బులెటిన్ విడుదల చేయడం కూడా ఆలస్యం అవుతున్నట్టు తెలుస్తోంది. ఏది ఏమైనా.. అపోలో వర్గాలు ఇచ్చిన మాట ప్రకారం, ఎప్పుడు, ఏ క్షణమైనా జయలలిత ఆరోగ్య పరిస్థితిపై హెల్త్ బులెటిన్ విడుదల చేసే అవకాశం మాత్రం వుంది.