అమ్మకు మళ్లీ అంత్యక్రియలు!

తమిళనాడు దివంగత సీఎం జయలలిత కుటుంబ సభ్యులు ఆమెకు మళ్లీ అంత్యక్రియలు నిర్వహించారు. బ్రాహ్మణ సంప్రదాయంలో ఆచార వ్యవహారాతో కర్మకాండలు జరిపారు.

గుండెపోటుతో డిసెంబర్ 5న మరణించిన అమ్మకు ఆ మరుసటి రోజు చెన్నైలోని మెరినా బీచ్ లో ఉన్న మాజీ సీఎం ఎంజీఆర్ సమాధి వద్ద అంత్యక్రియలు నిర్వహించారు. అయితే ఆమె పుట్టిన అయ్యంగార్ల సంప్రదాయం ప్రకారం చనిపోయాక శాస్త్రోక్తంగా దహనం చేయాలి. కానీ తమిళనాడులో ఉన్న ద్రవిడ ఉద్యమ ప్రభావం నేపథ్యంలో అమ్మ పార్ధివ దేహాన్ని దహనం చేయకుండా...ఒక పెట్టేలో ఉంచి ఖననం చేశారు.

సనాతన హిందూ కుటుంబంలో పుట్టిన అమ్మ...చనిపోయినప్పుడు..అయ్యంగార్ ఆచార వ్యవహారాలను అనుసరించే అంత్యక్రియలు, కర్మకాండలు జరపాలి. అలా జరగలేదు కాబట్టి..ఆమె ఆత్మకు మోక్షం లభించేవిధంగా ఆమె కుటుంబ సభ్యులు... (జయ సవతి తల్లి కుమారుడు వరదరాజు) కర్ణాటకలోని కావేరి నది తీరాన పశ్చిమ వాహిని (శ్రీరంగ పట్న) వద్ద మంగళవారం శాస్త్రబద్ధంగా అంత్యక్రియలు జరిపించారు. ఆమెను పోలిన ఓ పోతబొమ్మకు పూజలు నిర్వహించిన..దానిని దహనం చేశారు.

రంగనాథ్ అయ్యంగార్ జయను పోలిన బొమ్మను దహన సంస్కారాలు నిర్వహించారు. ‘అమ్మ పార్దవదేహాన్ని దహనం చేసి ఉండాల్సింది. అలా చేస్తేనే మోక్షం లభిస్తుంది. అలా జరగనందున...ఐదు రోజుల పాటు ఆమె ఆత్మకు మోక్షం లభించే విధంగా ప్రత్యేక పూజలు చేస్తున్నాం’ అని రంగనాథ్ చెప్పారు.

‘మా సోదరి (జయ) నాస్తికవాది అయ్యి ఉండి ఉంటే ఆమె హిందూ దేవాలయాలను సందర్శించకుండా ఉండేవారు. హిందూ పండుగల్లో పాల్గొనకుండా ఉండేవారు. ఆమె దేవుళ్లను నమ్మేవారు. హిందూ మతాన్ని ఆచరించారు. అలాంటప్పుడు ఎందుకు ఆమె పార్టీ ఆమెను ఖననం చేశారు? ఆమె అంత్యక్రియలు హిందూ సంప్రదాయ ప్రకారం ఎందుకు నిర్వహించలేదు?’ అని ఆమె సోదరడు వరదరాజు ప్రశ్నిస్తున్నారు.
కర్ణాటకతో పాటు తమిళనాడులో ఉన్న బంధువులు కూడా జయకు అంతిమ సంస్కారాలు హిందూ సంప్రదాయం ప్రకారం జరగలేదని ఆవేదన వ్యక్తం చేస్తున్నారు. మైసూరు, మేల్కోటు వంటి ప్రాంతాల్లో ఉన్న ఆమె బంధువులు మంగళవారం వరదరాజు నిర్వహించిన జయ ‘అంత్యక్రియ’లో వారు పాల్గొన్నారు.