రెచ్చిపోయిన దోపిడీ దొంగలు... తుపాకులతో బెదిరించి చోరీ

బీహార్‌లో దోపిడీ దొంగలు రెచ్చిపోయారు. ఒక ముఠా అతి కిరాతకంగా దొంగతనానికి పాల్పడింది. జ్యూయలరీ షాపులోకి చొరబడి.. తుపాకీలతో బెదిరించి.. బంగారు నగలను దోచుకెళ్లారు. షాపు యజమానిని పొట్టనబెట్టుకున్నారు. ఈ చోరీ జూన్ 22వ తేదీన జరిగింది. దీనికి సంబంధించిన వీడియో ఇప్పుడు సోషల్ మీడియాలో చక్కర్లు కొడుతుంది. బీహార్ హజిపూర్‌లో రాత్రి 8 గంటల సమయంలో ఈ ఘటన చోటుచేసుకుంది. ఐదుగురు తుపాకులను పట్టుకుని నీలం జ్యూయలరీ షాపులోకి ప్రవేశించారు. షాపులోకి ప్రవేశించిన వెంటనే తుపాకీలను బయటకు తీసి కస్టమర్లను వేధింపులకు గురి చేశారు. అయితే షాపు యజమాని సునీల్ ప్రియదర్శి వారిని అడ్డుకోవడానికి ప్రయత్నించారు. దోపిడి జరగకుండా ఆపడానికి ప్రతిఘటించాడు. కానీ దుండగులు అతనిని దారుణంగా కొట్టారు. తుపాకులతో బెదిరింపులకు పాల్పడ్డారు. అదే సమయంలో షాపులో ఉన్న బంగారు నగలను తమ బ్యాగుల్లో నింపుకున్నారు. ఈ గొడవలో సునీల్ ప్రియదర్శిని కాల్చి చంపారు.


ఈ ఘటనతో నగరంలో విషాదఛాయలు అలుముకున్నాయి. దీనిపై జిల్లా పోలీసు సూపరింటెండెంట్ తక్షణ విచారణకు ఆదేశించారు. అలాగే నగల దుకాణం ఉన్న ప్రాంతంలోనూ ఇతర ప్రాంతాల్లో అదనపు భద్రత కోసం బలగాలను మోహరించారు. ఈ చోరీకి సంబంధించిన పూర్తి దృశ్యాలు సీసీ ఫుటేజీలో రికార్డ్ అయ్యాయి. అయితే ఈ కేసుకు సంబంధించి ఇప్పటివరకు ఎవరినీ అరెస్టు చేయలేదు.

అయితే బీహార్‌లో ఇలాంటి సంఘటనలు పరిపాటిగా జరుగుతూనే ఉన్నాయి. గత ఏప్రిల్‌లో ఛప్రా జిల్లాలోని అమ్మూర్ పోలీస్ స్టేషన్ పరిధిలోని షేక్‌పురా సూపర్ మార్కెట్‌లోని ఓ కిరాణా షాపులో దోపిడీ జరిగింది. ఇద్దరు దొంగలు కస్టమర్ల స్టైల్లో షాపులోకి చొరబడి.. పిస్టోల్స్‌తో బెదిరించి షాపు యజమాని నుంచి డబ్బులు డిమాండ్ చేశారు. వారిని అడ్డుకునే ప్రయత్నం చేయగానే షాప్ కీపర్‌ను తుపాకీతో కాల్చేశారు. తర్వాత కౌంటర్‌లో డబ్బులు తీసుకుని అక్కడ నుంచి వెళ్లిపోయారు.