భార్య ఆచూకీ కోసం 600 కి.మీ. సైకిల్ ప్రయాణం!

భార్యాభర్తల బంధం ఎంత బలమైనదో చెప్పే ఘటన ఇది. చిన్న చిన్న గొడవలకే భార్యాభర్తలు కటిన నిర్ణయాలు తీసుకుంటున్న ఈ రోజుల్లో.. తప్పిపోయిన తన భార్య ఆచూకీ కోసం ఓ 42 ఏళ్ల వ్యక్తి సైకిల్‌పై 600 కి.మీ. ప్రయాణం చేశాడు. జార్ఖండ్ నుంచి సైకిల్‌పై బయలుదేరిన అతను 24 రోజులపాటు 600 కి.మీ. సైకిల్‌పై ప్రయాణించి మొత్తానికి పశ్చిమ బెంగాల్‌లో తన భార్యను కలుసుకున్నాడు. వివరాలు ఇలా ఉన్నాయి..

జార్ఖండ్‌లోని మూసబని తాలుక బలిగొండ గ్రామానికి చెందిన మనోహర్ నాయక్ (42) భార్య అనిత జనవరి 14న తప్పిపోయింది. సంక్రాంతి సందర్భంగా కుమ్రసోల్‌ గ్రామంలోని కన్నవారి ఇంటికి వెళ్లిన అనిత.. ఆ రోజు నుంచి కనిపించకుండా పోయింది. దీంతో రోజు కూలీగా పనిచేస్తున్న మనోహర్.. భార్య ఆచూకీ కనుక్కోవడానికి సైకిల్‌పై బయలుదేరాడు. రోజుకి 25 కి.మీ. చొప్పున మొత్తం 24 రోజుల్లో 65 గ్రామాల్లో సైకిల్ తిరిగి తన భార్య ఆచూకీ కోసం ప్రయత్నించాడు. మొత్తానికి కిందటి వారం పశ్చిమ బెంగాల్‌లోని ఖరగ్‌పూర్‌లో అనితను మనోహర్ కనుగొన్నాడు.

కనిపించకుండా పోయి రెండు రోజులు అయినా తన భార్య ఇంటికి రాకపోవడంతో మూసబని, దుమరై పోలీస్టేషన్లలో ఫిర్యాదు చేశానని మనోహర్ చెప్పాడు. అయినప్పటికీ ఫలితం లేకపోవడంతో రాష్ట్రం మొత్తం తిరిగి వెతకాలని నిర్ణయించుకున్నట్లు తెలిపాడు. తన భార్యకు మతిస్థిమితం సరిగా లేదని, ఎవరితోనూ సరిగా మాట్లాడలేదని వెల్లడించాడు. ‘నా భార్యను వెతుక్కుంటూ ఒక గ్రామం నుంచి ఇంకో గ్రామానికి వెళ్లిపోయాను. ఈ క్రమంలో ఎంత దూరం ప్రయాణించానో కూడా నాకు తెలీదు’ అని మనోహర్ చెప్పడం అతనికి తన భార్యపై ఉన్న ప్రేమను తెలియజేస్తుంది.

ఎన్ని గ్రామాలు వెతికినా తన భార్య ఆచూకీ దొరకకపోవడంతో చివరకు స్థానిక వార్తాపత్రికలను నమ్ముకున్నాడు. తన భార్య ఫొటోను వార్తాపత్రికల్లో ముద్రించాడు. దీంతో పేపర్లో వచ్చిన అనిత ఫొటోను చూసిన కొంతమంది ఖరగ్‌పూర్‌లో రోడ్డు పక్కన ఉన్న ఆమెను గుర్తించారు. వెంటనే పోలీసులకు సమాచారం అందించారు. ఖరగ్‌పూర్ పోలీసులు అనిత ఫొటోలను వాట్సాప్ ద్వారా మూసబని పోలీసులకు పంపడంతో మనోహర్ తన భార్యను గుర్తుపట్టాడు. మొత్తానికి ఫిబ్రవరి 10న ఈ దంపతులిద్దరూ కలుసుకున్నారు. భార్య ఆచూకీ కోసం మనోహర్ చేసిన ప్రయత్నం ఫలించింది. ఫిబ్రవరి 11న ఖరగ్‌పూర్ నుంచి మనోహర్, అనిత ఇంటికి బయలుదేరి వెళ్లారు.