డేరా బాబా లీలలను బయటపెట్టిన జర్నలిస్ట్ ఆత్మహత్య!

వివాదస్పద ఆధ్యాత్మిక గురువు, డేరా సచ్చా సౌదా చీఫ్ గుర్మీత్ రామ్ రహీమ్‌సింగ్‌పై నమోదైన అత్యాచారం కేసులో పంచకుల సీబీఐ కోర్టు నేడు తీర్పు వెలువరించనున్న విషయం తెలిసిందే. ఇద్దరు మహిళలపై అత్యాచారంతోపాటు ఈ ఘటనను బయటపెట్టిన జర్నలిస్ట్ రామ్‌ చందేర్ ఛత్రపతి హత్య కేసుపై కూడా నేడు తీర్పు వెల్లడవుతుంది. పూరe సచ్చా పేరుతో స్థానికంగా ఓ దిన పత్రికను నడిపే జర్నలిస్ట్ ఛత్రపతి సిర్సాలోని డేరా ప్రధాన కార్యాలయంలో ఇద్దరు మహిళలపై గుర్మీత్ బాబా అత్యాచారానికి పాల్పడినట్లు 2002లో బయటపెట్టారు. రామ్ రహీమ్ సింగ్ లైంగిక వేధింపులను బయటపెట్టిన కొద్ది నెలల తర్వాత అంటే 2002 అక్టోబరు 24 న జర్నలిస్ట్ ఛత్రపతి పాయింట్ బ్లాక్‌పై తుపాకితో కాల్చుకుని తన నివాసం సమీపంలో ఆత్మహత్యకు పాల్పడ్డారు.

తన తండ్రిని హత్య చేశారని, ఇది ఆత్మహత్య కాదంటూ జర్నలిస్ట్ కుమారుడు అన్షూల్ న్యాయం కోసం ఒంటరి పోరాటం చేస్తున్నాడు. అంతకు ముందు గుర్మీత్ బాబా అక్రమాలపై పత్రిక ద్వారా ఛత్రపతి అనే విషయాలను వెల్లడించాడు. అప్పటి ప్రధాని అటల్ బిహారీ వాజ్‌పేయి, పంజాబ్ అండ్ హర్యానా హైకోర్టు ప్రధాన న్యాయమూర్తితోపాటు ఇతర ప్రభుత్వ ఉన్నతాధికారులకు గుర్మీత్ బాబా అక్రమాలు, లైంగిక వేధింపుల గురించి తెలుపుతూ పూరా సచ్చా పత్రిక ద్వారా మూడు పేజీల లేఖను ప్రచురించారు.

డేరా సచ్ఛా ప్రధాన కార్యాలయంలో గురువు రామ్ రహీమ్ సింగ్ మహిళలపై లైంగిక అకృత్యాల‌కు పాల్పడుతున్న విషయాన్ని స్పష్టంగా వివరించాడు. పత్రికలో ప్రచురితమైన కథనానికి స్పందించిన హైకోర్టు ప్రధాన న్యాయమూర్తి ఈ విషయంపై న్యాయవిచారణ జరిపించాలని జిల్లా సెషన్స్ జడ్జ్‌ను ఆదేశించారు. హైకోర్టు ఆదేశాలతో జిల్లా న్యాయమూర్తి సమీక్షించి దీనిపై సీబీఐ విచారణ చేయాలని సిఫార్సు చేశారు. దీంతో 2002 డిసెంబరు 12 న సీబీఐ కేసు నమోదు చేసింది. ఐపీసీ సెక్షన్ 376, 506, 509 కింద కేసు నమోదు చేసిన సీబీఐ దర్యాప్తు ప్రారంభించింది.